Гаалийн Ерөнхий Газрын харьяа Улаанбаатар хот дахь Гаалийн газрын гаалийн улсын байцаагчид эрсдэл тооцсон хяналтыг хэрэгжүүлэн ажилласнаар эрүүгийн гэмт хэргийн шинжтэй байж болзошгүй зөрчлийг илрүүлэн таслан зогсоосон талаар бид мэдээлсэн. Тэгвэл хэргийн талаар илүү дэлгэрэнгүй мэдээллийг хүргэж байна.
Тодруулбал, Гаалийн газрын “Материал импекс” дэх гаалийн хяналтын бүсэд  энэ сарын 15-ны өдөр АНУ-аас илгээгдэн ирсэн, WCSU612650-7 дугаарын чингэлэгтэй Монгол Улсын иргэн М-н суудлын автомашин, мотоцикл, гэрийн ахуйн бараа гэж мэдүүлсэн бараанд гаалийн улсын байцаагч нар эрсдэлд суурилсан гаалийн хяналт шалгалтыг хийснээр 7,62 мм –ийн хийн гар буу-1 ш, винтов маркийн урт бууны 340 ш сумыг илрүүлэн олж тогтоосон байна.
Дээрхи үйлдэл нь эрүүгийн гэмт хэргийн шинж чанартай байсан тул харьяалалын дагуу хууль хяналтын байгууллагад шалгуулахаар шилжүүллээ.  2013 оны 11 сарын байдлаар Гаалийн байгууллага гаалийн хяналт шалгалтын явцад илэрсэн гэмт хэргийн шинжтэй 100 гаруй үйлдлийг таслан зогсоогоод байна.