Жендэрт суурилсан хүчирхийлэлтэй тэмцэх 16 хоногийн аяны талаар албаныхан болоод төрийн бус байгууллагууд өнөөдөр танилцууллаа. Энэ үеэр ЦЕГ-ын Нийгмийн хэв журам хамгаалалтын газрын хүүхдийн гэмт хэргээс урьдчилан сэргийлэх хэлтсийн эрхлэгч Т.Ариунтуяатай гэр бүлийн хүчирхийллийн талаар яриа өрнүүллээ.

-Манай улсад  гэр бүлийн хүчирхийлэлтэй тэмцэх тухай хууль хэрэгжиж эхлээд нэлээд хэдэн жил болж байна. Үр дүн нь харагдах юм уу?
-Манайд энэ хууль хэрэгжиж эхлээд есөн жил болж байна. Гэвч иргэд энэ хуулийн хамгаалалтыг авч чадахгүй, амь насаа алдсан хохирогчдын тоо нэмэгдсээр байна. Гэр бүлийн хүрээнд ойр дотныхоо хүний амь насыг хөнөөх, гэр бүлээр нь хүйс тэмтрэх, хүүхдийг зовоон тарчлаах зэрэг хүнд ноцтой гэмт хэргүүд онц хэрцгий аргаар үйлдэгдэх болсон.

-Гэр бүлийн хүчирхийлэлд өртсөн хүмүүийн тоо баримт, судалгааны дүн байдаг уу?
-Монгол улсын хэмжээнд 2008-2012 оны эхний 7 сарын байдлаар 1589 хүн гэр бүлийн хүчирхийллийн улмаас гэмт хэргийн хохирогч болжээ. Үүнээс 61 хүн амь насаа алдаж, долоон хүн амиа хорлоход хүрч 1092 хүн гэмтэл авч, 53 хүн бэлгийн хүчирхийлэлд өртсөн байна.  Гэвч энэ тоо гэр бүлийн хүчирхийллийн үнэн бодит дүр төрхийг харуулж чадахгүй. Хүчирхийллийн улмаас үүссэн дээрх гэмт хэргүүд буурахгүй байгаа нь нэг талаас Гэр бүлийн хүчирхийлэлтэй тэмцэх тухай хууль, Хүн худалдаалах гэмт хэрэгтэй тэмцэх хууль болон бусад холбогдох хуулиудад хохирогчийн аюулгүй байдлыг хамгаалах механизм, оновчтой зохицуулалт байхгүйтэй холбоотой.  Нөгөө талаас бид нийгэм, хамт олноороо хүчирхийллийн энэ үйлдлийг буруутгахгүй, харин ч өөгшүүлэн дуугүй байсаар байна. 

-Хохирогч хамгаалуулж чадахгүйн улмаас дахин хохирох тохиолдол гардаг уу?
-2012 оны дөрөвдүгээр сарын тавны өдөр 22 настай хохирогч Г  нөхөртөө 12 удаа хутгалуулан амиа алдсан. Г нь гэр бүлийн хүчирхийлэлтэй тэмцэх тухай хуулийн дагуу оршин сууж байсан хороондоо болон цагдаагийн байгууллагад хандахад туслаагүй гэсэн. Эцэст нь нөхөртөө эрх хязгаарлах арга хэмжээ авахуулахаар удаа дараа шүүхэд хандсан боловч шүүгч “нотлох баримтгүй” гэдэг шалтгаанаар түүнд хамгаалалт тогтоохоос татгалзсан байна. Талийгаач Г-ийн нөхөр 22 жилийн хорих ялаар шийтгүүлж, гурван настай хүү нь өнчирч үлдсэн харамсалтай хэрэг гарсан. Энэ хэргээс хойш дөрвөн сарын дараа талийгаач Г-ийн ээж сэтгэлийн хямралын улмаас нас барсан байна. Зөвхөн өдөр тутмын хэвлэл мэдээллийн хэрэгслээр олон нийтэд мэдээлэгдэж, ил гарсан нь энэ болохоос цаана нь илрээгүй олон хэрэг нуугдаж байгаа.  Гэсэн хэдий ч хүчирхийлэл үйлдэгч хөнгөн ял шийтгэл хүлээх, эсвэл ямар ч хариуцлага хүлээхгүй ял завших байдал үргэлжилсээр байна.

- Гэр бүлийн хүчирхийллээс хамгаалахын тулд яах ёстой вэ?
-Гэр бүлийн хүчирхийлэлтэй тэмцэх тухай хуулийн шинэчилсэн найруулгын төслийг 2014 оны УИХ-ын хаврын чуулганаар батлуулах хэрэгтэй байна. Мөн Хүүхдийг гэр бүлийн хүрээнд зодож шийтгэхийг хуулиар хориглох, цагдаагийн байгууллагын бүтцэд гэр бүлийн хүчирхийлэлтэй тэмцэх тусгай нэгж байгуулж ажиллуулах талаар мөрийн хөтөлбөрт тусгасан амлалтаа биелүүлэхийг засгийн  газраас шаардах, хохирогчдод чиглэсэн үйлчилгээ, хамгаалах байрны зардлыг улсын болон орон нутгийн төсвөөс санхүүжүүлэхийг шаардах, хохирогчийг хамгаалахаар гаргасан шүүхийн шийдвэрүүдийг биелэгддэг болгохын тулд хуулийн үр дүнтэй механизмыг бий болгох зэрэг алхмуудыг цаг алдалгүй хийх шаардлагатай байна.