УИХ-ын гишүүн Н.Номтойбаярын хэргийг прокурорын байгууллагаас нэмэлт мөрдөн байцаалтад буцаагаад байгаа юм. Тэгвэл энэ талаар  Н.Номтойбаярын өмгөөлөгч Н.Мандахаас зарим зүйлийг тодрууллаа. 

-Н.Номтойбаяр гишүүнд холбогдох хэргийг ямар үндэслэлээр нэмэлт мөрдөн байцаалтад буцаасан бэ?
-Прокурорын байгууллагаас мөрдөн байцаалтын ажиллагаа дутуу хийгдсэн, хуулийн дагуу хийгдээгүй гэсэн үндэслэлээр нэмэлт мөрдөн байцаалтад буцаасан. Бидний зүгээс ч гэсэн хавтаст хэрэгтэй танилцаад мөрдөн байцаах ажиллагаа хуулийн дагуу тэнцвэртэй биш, шударга бус явуулсан гэж үзсэн.  Тиймээс Сүхбаатар дүүргийн цагдаагийн хэлтсээс яллах дүгнэлт үйлдүүлэхээр прокурорын байгууллагад шилжүүлсэн нь хэт нэг талыг барьж, хэлмэгдүүлэн шалгасан хэмээн гомдол гаргасан байгаа.

-Яг ямар үндэслэлээр хэлмэгдүүлсэн гэж үзэж байна вэ?
-Яллагдагчаар татагдаад буй Г.Нямдоржоос хурааж авсан хутгыг өөрөө ч миний гарт байсан хутга гэдгээ хүлээн зөвшөөрсөн байтал мөрдөн байцаагчид Н.Номтойбаярын гарт байсан мэт үзэж, эд мөрийн баримт хэрэгт хавсаргах тогтоол үйлдэж, дээд байгууллагадаа танилцуулсан. Мөн шүүх эмнэлэгт хүргүүлж, шинжээч эмчийг байцааж, прокурорт яллах дүгнэлт үйлдүүлэхээр шилжүүлсэн зэрэг ноцтой алдаа гаргасан. Энэ нь УИХ-ын гишүүн Н.Номтойбаярыг гэмт хэрэг хийсэн мэт харагдуулсан. Тиймээс УИХ-ын гишүүний зүгээс ЦЕГ-ын дарга С.Билэгтэд хандаж гомдол гаргасан.

-Гомдолд ямар асуудлуудыг дурдсан бэ?
-Мөрдөн байцаалтын ажиллагаа хуульд заасны дагуу явагдаагүй, хэт нэг талыг барьж шалгасан, бүрдэл дутуу, шалгах ёстой зүйлсийг  шалгаагүй гэх мэт үндэслэлээр 57 асуудлыг нэмж шалгуулахаар өнөөдөр цагдаагийн байгууллагад хандсан. Өөрөөр хэлбэл тухайн зэвсгийн чанартай зүйлийг хэн хэрэглэсэн, яаж хэрэглэсэн эсэх тодорхойгүй байхад сайн шалгаагүй гэж үзсэн. Мөн УИХ-ын гишүүн Н.Номтойбаярын зүгээс твиттер хуудсаараа дамжуулж яллагчаар цацсан тогтоолын нэг хувийг тавьсан байсан. Гэхдээ энэ бол гишүүний зүгээс мөрдөн байцаалтын нууц задруулсан байр суурь биш. Өөрөөр хэлбэл,  тавигдсан гээд байгаа тогтоолын Ганбаатар овогтой Нямдоржид ялагчаар тогтох тогтоолыг танилцуулсаны дараа доод хэсэгт нь Н.Номтойбаяр гэж тавьсан байгаа нь хууль зүйн үндэслэлгүй тогтоол юм. Тиймээс гишүүний зүгээс үүнийг олон нийтэд дэлгэсэн. Мөн УИХ-ын гишүүнийг бүхий л талаар гэмт хэрэг үйлдсэн мэтээр үзэж байгааг бид буруутгаж байна. Энэ хэргийг мөрдөн байцаалтын Сүхбаатар дүүргийн цагдаагийн хэлтэст явагдаж байгаа. Өнөөдөр нэмэлт мөрдөн байцаалтанд буцсанаас болж хэргийн мөрдөн байцаалт түр зогссон байдалтай байна.

-Яллагдагчаар татсан тогтоолыг УИХ-ын гишүүн Н.Номтойбаяр урьдчилан олж авсан байдаг. Гишүүнийхээ эрхийн хүрээнд олж авав уу?
-Эрүүгийн байцаан шийтгэх ажиллагаанд оролцогчийн хувьд хэргийн материалтай танилцах эрхийнхээ дагуу тус алдаатай тогтоолыг олж авсан. Өөрөөр хэлбэл, гишүүн хувь хүнийхээ хувьд эрүүгийн байцаан шийтгэх хуулийн 42.3.8, эрүүгийн байцаан шийтгэх хуулийн 212.2-т заасан эрхийнхээ хүрээнд л хэргийн материалтай танилцсан. Түүнээс биш УИХ-ын гишүүний бүрэн эрхийнхээ хүрээнд олж аваагүй. Тийм эрх УИХ-ын гишүүн байтугай УИХ-ын даргад ч байхгүй. Ер нь Н.Номтойбаяр  гишүүн хэргийн мөрдөн байцаалтанд их хурлын гишүүний бүрэн эрхийнхээ хүрээнд саад учруулаагүй.

-Энэ хэргээс болж өмнө нь баавгай агнасан хэрэг сөхөгдсөн. Энэ хэрэг юу болж байна?
-Баавгайны асуудал өмнө нь шалгагдаад тогтоогдчихсон. Өөрөөр хэлбэл УИХ-ын гишүүн бус өөр хүмүүс энэ хэрэгт холбогдсон. Миний зүгээс ийм л тайлбарыг өгнө.