Үнэт цаас, мөнгөн тэмдэгт хуурамчаар үйлдэх, ашиглах хэрэг бүртгэгдсээр байна. Тиймээс эрүүгийн цагдаагийн газар, цагдаагийн байгууллага, Санхүүгийн зохицуулах хороо, "Монгол" банкнаас ажлын хэсэг гарган энэ хэрэг дээр ажиллаж байгааг бид мэдээлж байсан. Өөрөөр хэлбэл, хуурамч мөнгөн тэмдэгт хаана хийгдэж байгаа хийгээд илэрсэн мөнгөн тэмдэгтийг хэрхэх талаар холбогдох ажил хийгдэж байгаа. Өнгөрсөн амралтын өдрүүдэд л гэхэд Баянгол дүүргийн дөрөвдүгээр хороо ”Голомт” банкны есдүгээр салбар дээр хуурамч мөнгөн тэмдэгтээр гүйлгээ хийсэн хүн байна гэсэн мэдээллээр шалгахад Сонгинохайрхан дүүргийн 29 дүгээр хороонд оршин суух 27 настай эрэгтэй З гэгч нь хуурамч 20 мянгатын дэвсгэртээр гүйлгээ хийсэн байсныг Баянгол дүүргийн цагдаагийн хоёрдугаар хэлтэс шалгаж байна. Тэгвэл өчигдөр дэлгүүрт хуурамч 20 мянгатын дэвсгэртээр гүйлгээ хийх гэж байгаад баригдсан тохиолдол бүртгэгджээ. Түүнчлэн хуурамч мөнгөн тэмдэгтээр гүйлгээ хийсэн олон хүнийг сэжигтнээр татан шалгаж байгаа аж.