Эрүүл мэндийн сайд Н.Удвал Япон улсаас манай улсад ирж зүрх судасны гажигтай бага насны хүүхдэд судсан дотуур мэс ажилбар хийх тусламжийг үзүүлж байгаа эмч нарын багийн ахлагч Ханэда, Томита, Хигаки нарыг 11 дүгээр сарын 25-ны өдөр ЭМЯ-ны хүндэт тэмдгээр шагналаа.Сайд Н.Удвал хэлэхдээ, “Хүн ардын эрүүл мэндийг хамгаалах үйлст үнэтэй хувь нэмэр оруулж байгаад талархаж байна. Та бүхний сайн санааны тусламжаар олон хүүхдийн амь нас аврагдаж, олон гэр бүлд баяр баяслыг авч ирлээ” гэв.
Япон улсын “Heart saving project” буюу “Зүрхээ хамгаалъя сан” нь Улсын гуравдугаар төв эмнэлэгтэй 11 жилийн турш хамтран ажиллаж байгаа бөгөөд одоогоор 300 гаруй хүүхдэд хагалгаа хийж амь насыг нь аварсан байна. Энэ удаа Японы эмч нарын баг зүрхний гажигтай бага насны нийт 29 хүүхдэд судсан дотуурх мэс заслыг хийх бөгөөд 11 дүгээр сарын 27-ны өдөр сүүлийн 4 хүүхдэд хийх аж. Тус хагалгаа нь манай улсын зүрхний гажигтай бага насны хүүхдүүдэд эмнэлгийн төгс тусламжийг үзүүлж олон арван хүүхдийн амь насыг аврах, зарим гадаадад эмчлэгдэхэд хүрээд байсан хүүхдүүдийг эх оронд нь үнэ төлбөргүй тусламж үйлчилгээг үзүүлж байгаагаараа өндөр ач холбогдолтой болжээ.
Түүнчлэн саяхан олон улсын Ротари клуб болон Сөүлийн үндэсний их
сургуулийн эмнэлгийн хамтын ажиллагааны хүрээнд Монгол улсад хэрэгжиж
буй “Хүүхдийн зүрх" төслийн шугамаар тус эмнэлэг дээр 4 сартайгаас 4
хүртэлх насны 10 хүүхдэд зүрхний мэс заслын эмчилгээг төслийн эмч нарын
багтай хамтран тус эмнэлгийн зүрхний мэс заслын хамт олон амжилттай
хийж гүйцэтгэлээ. Энэ үйл ажиллагаа нь Монгол улсад анх удаа бага насны,
бага жинтэй хүүхдийн зүрхний хавсарсан хүнд гажгийн мэс заслыг үнэ
төлбөргүйгээр эх оронд нь хийснээрээ онцлог юм. Эрүүл мэндийн сайд
Н.Удвал эдгээр хүүхдүүдийн биеийн байдалтай танилцаж, эцэг эх, ар
гэрийнхэнтэй нь уулзаж санал сэтгэгдлийг нь сонслоо.
Үүний дараа Сайд Н.Удвал эмнэлгийн захиргаа удирдлагуудтай уулзаж тус эмнэлгийн одоогийн тулгамдаж буй асуудлууд болон цаашид хийх ажил, салбарын суурь шинэчлэлийн бодлогын хэрэгжилтийн явцтай танилцаж, иргэд үйлчлүүлэгчдэд тус эмнэлгийн үзүүлж буй лавлагаа, зэрэглэлийн тусламж үйлчилгээг хүндрэл, чирэгдэлгүй үзүүлэх зэрэг асуудлуудаар санал солилцов. Түүнчлэн Сайд тус эмнэлгийн “Харвалт ба шигдээс” төслийн хүрээнд байгуулагдсан Харвалт, Шигдээсийн тасгууд болон Ангиограф, Компьютер томографийн лабораториудтай танилцлаа. Гуравдугаар төв эмнэлгийн дарга Ц.Төмөр-Очир “Өнгөрсөн жилд манай эмнэлэгт 15 мянган хүн хэвтэн эмчлүүлсэн. Харин энэ жил Яаралтай тусламжийн тасгийг нээснээр 11 сарын байдлаар 15 мянган хүн хэвтэн эмчлүүлээд байна. Энэ нь хүлээгдэл буурч байгаагийн нэг жишээ юм” гэдгийг цохон хэллээ.
