БНХАУ-ын төрийн өмчийн оролцоотой компани Монгол Улсын харилцаа холбооны аюулгүй байдалд нөлөөлөхүйц үйл ажиллагаа явуулж байгаа талаарх мэдээлэл гадаадын болон дотоодын хэвлэл, мэдээллийн хэрэгслээр цацагдсан.

Үүнтэй холбоотойгоор, ZTE компанийн удирдлагууд болон Монголын томоохон албан тушаалтнуудыг авлигын хэрэгт холбоотой байж болзошгүй хэмээн шалгаж байгаа. Энэ талаар Авлигатай тэмцэх газрын Мөрдөн байцаах хэлтсийн дарга Э.Амарбат хэлэхдээ  “ZTE” компанийн томоохон албан тушаалтнуудын нэр холбогдсон их хэмжээний мөнгөтэй холбоотой асуудлыг шалгаж байгаа нь үнэн. Үүнд, Үндэсний татварын ерөнхий газрын Хяналт, шалгалтын хэлтсийн дарга Ч.Гансүх нарыг шалгаж байгаа. Одоогийн байдлаар тус компанийн удирдлагуудыг батлан даалтад гаргаад байгаа“ гэв.  Тус  компанийн Монгол дахь захирал нь Өвөрмонгол хүн байдаг бөгөөд түүнийг суллахын тулд таслан сэргийлэх арга хэмжээний барьцаа хөрөнгө болгон нэг сая ам.доллар буюу 1.5 тэрбум орчим төгрөг авсан талаар ч эх сурвалж мэдээлсэн юм.

Монголын харилцаа холбооны тоног төхөөрөмжийг нийлүүлдэг Хятадын “ZTE” гэх эл компани олон улсад өөрсдийн тавьсан техникээрээ дамжуулан иргэдийн яриаг чагнасан гэх хэрэгт ч холбогдоод байгаа юм. Дээр нь цөөнгүй орны эрх баригчдад нь авлигал өгч, тэр нь баримттайгаар нотлогдсон байдаг. Тиймээс энэ компани аль хэдийнэ  Монголын Засгийн газарт гараа дүрээд эхэлчихсэн  гэдгийг зарим хүмүүс хэлдэг.
“ZTE”-ийн 51 хувь нь Хятадын төрийн өмчид байдаг. Монголд 2004 онд төлөөлөгчийн газраа байгуулж, үүрэн телефоны оператор “Skytel” компанитай хамтран СDМА-2000 технологиор манай улсын баруун, өмнөд бүс нутагт тоон радио релейний сүлжээ байгуулах төслийг хэрэгжүүлж эхэлсэн байдаг. Мөн “G-mobile”-ийн сүлжээ 100 хувь энэ компаний төхөөрөмж дээр суурилдаг гэдгийг ч зарим хүмүүс мэдэж байгаа байх.  Монголын Засгийн газар, төрийн байгууллагуудад дүрст хурлын систем, “Монголын цахилгаан холбоо” ХК-д интернэт, МШХХТГ-т хот доторх болон олон улсын яриаг хянах “Softswitch” систем суулгах ажлыг хийж гүйцэтгэсэн нь ZTE корпораци төрийн болон төрийн бус байгууллагуудын үйл ажиллагаа, хүмүүсийн хэл яриа, дүрс бичлэгийг хуулж авах бүрэн боломжтой гэсэн үг юм.

“ZTE”-гийн энэ хэрэгт Үндэсний татварын  ерөнхий газрын хяналт шалгалтын хэлтсийн дарга Ч.Гансүхийг хүүтэй нь, Төсвийн орлогын хураалтын тасгийн дарга Ч.Энхбат, байцаагч Бямбасүрэн нарыг өнгөрөгч хоёрдугаар сард АТГ-аас саатуулан шалгаж эхэлсэн. “ZTE”-гийн хэрэгт Монголын талаас холбогдсон дээрх эрхмүүдийн хувьд ҮТЕГ-ын Хяналт, шалгалтын хэлтсийн дарга Ч.Гансүхийн хүүгийн дансаар 16 тэрбум төгрөг эргэлдүүлсэн, Ч.Гансүхийн аав Чимидийн дансаар нэг тэрбум 200 гаруй сая төгрөг, ам.доллартай болохыг тогтоосон байдаг.  Мөн түүний бас нэг хүү АНУ-д суралцаж байх үеэрээ дансаараа нэг сая гаруй ам.доллар эргэлдүүлж байсан гэдэг.  “ZTE” Монголд нэлээд томоохон төслүүд дээр ажилласан. Эдгээр ногдох татварын асуудлыг Ч.Гансүх ажил үүргийнхээ хуваарийн дагуу оролцож, шалгаж байсан гэж зарим эх сурвалжууд мэдээлж байна.

Тус компанийн энэ хэрэгт зөвхөн татварынхан ч буруутгагдаад зогсохгүй, татварын хуурамч акт, шинжилгээ үйлдсэн хэмээн Шүүхийн шинжилгээний үндэсний төвийн хоёр шинжээчийг эрүүгийн хэрэгт татаж хорьсон.
Өдгөө энэ хэрэгт “Скайтел” компанийн санхүүгийн тайлан тооцоо дансаар нь орж гарсан мөнгийг нягталж эхэлсэн гэж байгаа. Түүнчлэн, УИХ-ын гишүүн, Боловсрол, соёл шинжлэх ухааны сайд асан Ё.Отгонбаярыг ч холбогдуулан шалгаж байгаа аж. Түүнийг  тус компаниас авлига авсан, өгсөн, авахыг завдсан гэх үндэслэлээр буруутгаж буй юм. Гэвч Ё.Отгонбаяр гишүүний хувьд үүнийг үгүйсгэсээр байгаа билээ.

Юутай ч тус компани манай улсад үйл ажиллагаа явуулж байх хугацаандаа 15 тэрбум төгрөгийн бараа бүтээгдэхүүн худалдаж, 200 орчим сая ам.долларын ашигтай ажилласан гэсэн судалгаа байдаг аж. Энэ мэтээрээ гадны компанийн энэ увайгүй үйлдэл цаашид даамжирч олон компани, албан тушаалтнуудыг хоморголон шалгах бололтой.