Өнгөрсөн тавь дахь өдөр Увс аймгийн Тариалан сумын засаг дарга хэдэн малчидаа дагуулж ирээд хэвлэлийн бага хурал хийж УИХ-ын гишүүн Ч.Хүрэлбаатар, Б.Чойжилсүрэн хоёрыг эргүүлэн татах талаар их л сүр дуулиантай ярив. Шударга ёсны төлөө тэмцэж байгаа гэх тэднийг буруутгах аргагүй. Гэхдээ тэд үнэхээр шударга ёсны төлөө ирсэн үү гэдэг өөр нэгэн асуудал урган гарч байна.

    Учир нь эдгээр малчид идэр есийн хүйтнээр, хөр цаснаар, ид ажлын цагаар автомашин хөлслөн 40 гаруй км замыг туулж аймгийн төвдөө ирсэн байна. Тэгээд Улаанбаатар хотод онгоцоор ирж. Бас онгоцоор буцаж, машин хөлслөн энэ маршрутаараа харих гэнэ. Хамгийн сонирхолтой нь малчид замынхаа бүх зардлыг хувиасаа гаргасан гэнэ. Бас тэгээд Ч.Хүрэлбаатар, Б.Чойжилсүрэн хоёрын багийнхнаас 100 мянган төгрөг тараасныг нотолсон учир энэ мөнгөө арав дахин нэмэгдүүлж Сонгуулийн ерөнхий хорооноос урамшуулал болгон өгсөн сая төгрөгийг ард түмний нүдэн дээр баатарлагаар гардуулав. Ширээн дээр гаргаж шидээд л, дахин дахин тоолоод л. Увсын малчид баян байнаа. Баян байна. Гэхдээ малчид гэнэт яагаад ингээд баярхаад унав гэдэг асуудал бүхний анхаарлыг татаж эхэллээ.

    Эх сурвалжийн мэдээлж байгаагаар бол Увс аймгийн Тариалан сумаас ирсэн шударга сонгогчид хоёр айлын, ах дүү дөрөв гэнэ. М.Хүүхээ, М.Эрдэнэчулуун гээд овог нэрийг нь харвал тэгж хардаж болохоор. Ах дүүсээрээ нийлж Улаанбаатарт ирж улс төр хийлээ гэж хардагдаад байгаа ийм дөрвөн иргэн дээр сумын Засаг дарга нь нэмэгджээ. Ингээд таван хүн нэг сумыг төлөөлж, нэг аймгийн иргэдийн олонхиороо сонгосон гишүүнийг эргүүлэн татахаар хөөцөлдөж эхлэв.

    Тэд “Сонгуулийн ерөнхий хороо хуулиа биелүүл”, “Төр хуулиа биелүүл! Иргэд бид хуулиа биелүүлсэн”, “Бид сая төгрөгийн төлөө хүн гүтгээгүй”, “Сонгуулийн ерөнхий хороо луйварчдыг өөгшүүлэхээ боль” гэх мэт сүрхий улс төржсөн уриа лоозонгоор зэвсэглэсэн байв.

    Монголын баруун хязгаар дахь амьдрал ахуйгаа орхин ирж улс төр хийж байгаа тэднийг буруутгах үндэсгүй. Хамгийн гол нь тэд өөрсдийнхөө зардлаар ирсэн үү гэдэг анхаарал татаж байна. Хэрэв тэд хэн нэгний захиалгаар улс төр хийж байгаа бол асуудал сайн зүйлд хүргэхүй. Тэд бүхий л зардлаа даалгаад бас Сонгуулийн ерөнхий хороог буруутган буцааж байгаа урамшуулалын нэг сая төгрөгнөөсөө хэд дахин илүү их мөнгө олж байгаа гэсэн яриа амралтын өдрүүдэд Увс аймгийн төвд тархсан байна. Увс аймагт тархаж буй энэ ярианы үнэн худлааг холбогдох байгууллагууд шалгаж нягталж шийдвэр гаргах биз.

    “Бид нарын нэр хугарч байна. Бид нарыг 100 мянган төгрөгийг сая төгрөг болгож авлаа гэж нутгийнхан муу хэлж байна” хэмээн мэдэгдсэн Увс аймгийн Тариалан сумын ах дүүсийн драм улс төрийг хөдөлгөөнд оруулж, хоёр том намын бодлогод нөлөөлөхөөр боллоо.