Төрд өндөр албан тушаал хашдаг хийгээд төрийн албанд ажилладаг эрхмүүд ажилтнаа дарамталж, биед нь халддаг жишиг манай улсад  тогтсон нь нууц биш. Энэ онд л гэхэд цөөнгүй ийм хэрэг  гарсаныг бид багцлан хүргэж байна.

БШУ-ын дэд сайд Б.Ургамалцэцэг  Төрийн нарийн бичгийн даргатайгаа хамтран яамныхаа газрын дарга руу аягатай цай цацаж, гэмтэл учруулсан байдаг. Тодруулбал, дэд сайд Б.Ургамалцэцэг нь зодооны үеэр яамныхаа газрын даргаар ажиллаж буй Л-ын гарыг барьж хорьсон төдийгүй түүний нүүр рүү халуувтар цай цацсан. Зодооны улмаас хохирогч Л-ын үүдэн хоёр шүд унаж, элэг болон дотор эрхтэнд доргилт, гэмтэл үүссэн байна. Эл хэргийн хохирогчийн шүүх эмнэлгийн дүгнэлт гарсан ч тухайн үед олноос нууцалсан юм. Маргаан юунаас үүдсэн нь тодорхойгүй ч “Алтангадасыг та нар яаж ч чадахгүй” гэх зэргээр дайрсан гэж эх сурвалжууд хэлсэн байдаг. Харин зодуулсан Л-ийн хувьд Ардчилсан намын гишүүн бөгөөд МоАХ фракцид харьяалагддаг нэгэн аж. Түүнчлэн, Б.Ургамалцэцэг хүн зодсон гэдгээ хүлээн зөвшөөрөхгүй байсаар энэ хэрэг намжсан юм.

Нийслэлийн Боловсролын газрын орлогч дарга Х.Батбаяр тус газрын технологийн мэргэжилтэн Г.Амарсанааг аравдугаар сарын 5-нд зодож, хүндээр гэмтээсэн хэрэг гарсаныг та бүхэн санаж байгаа биз ээ. Тодруулбал, 10 сарын 5 нд Олон улсын багш нарын эрхийг хамгаалах өдөр тохиож, нийслэлийн Боловсролын газар 1000 багшийн аялал зохион байгуулжээ. Ингээд нийслэлийн Боловсролын хамт олон Цэцээ гүний ойролцоох амралтын газар очиж амарч архи ууцгаан нэлээд халамцсан байдаг. Тус өдөр хохирогч Г.Амарсанаа ядарсан тул өөр гэрт амарч байгаад дарга нарын байрласан газар ортол нийслэлийн Боловсролын газрын орлогч дарга  Х.Батбаяр агсамнаж, “Чи намайг дарга гэж дуудаагүй учир архи хундагалж өг” гэжээ. Архиндаа халуурсан Х.Батбаяр ийнхүү олон юм яриж байгаад  Г.Амарсанаа руу 0,75 литрийн архины шил шидсэн нь толгойг нь хагалж, хүндээр гэмтээсэн байна. Хэмжээгээ мэдэхгүй ууж согтуураад  ажилтнаа үг хэлээр доромжлон гэмтээсэн   Х.Батбаяр гэм буруутай үйлдлийнхээ төлөө  ийнхүү ажлаасаа  халагдсан юм.

Хамгийн сүүлд л гэхэд Гадаад харилцааны яамны Төрийн захиргаа, удирдлагын газрын дэд дарга О.Золбаяр мэргэжилтнээ зодож, гэмтээсэн байгаа. Тодруулбал,  Тэрээр Дотоод аудит хяналтын газрын ажилтан н.Басбишийг зодсон байна. Тэдний хоорондын маргалдаан “Вива” ресторанд энэ сарын 6-нд болжээ. Эх сурвалжийн мэдээлж буйгаар О.Золбаяр тус ресторанд нэг ажилтанаа ажлаа өгөхийг шаардаж асуудал гаргасан байна. Харин түүний энэ үйлдэлд нь дургүйцлээ илэрхийлсэн н.Басбишийг зодож, хамрыг нь хугалж, хөмсгийг нь сэтэлсэн гэв. Одоогоор хэргийг Сүхбаатар дүүргийн цагдаагийн хэлтэст эрүүгийн хэрэг үүсгэн шалгаж байгаа аж. Дэд дарга О.Золбаяр нь туслахын суудлаас дэд даргын суудалд шилжсэн сүйхээтэй нэгэн юм. Тэрбээр ГХЯ-ны сайд Л.Болдын туслахаар ажиллаж байсан билээ.  Харин Басбиш нь одоогоор өвчтэй тул ажилдаа явахгүй байгаа бөгөөд шүүх шинжилгээний байгууллага гэмтлийн зэргийг нь тогтоохоор ажиллаж байгаа юм.


Төрийн өмчийн хорооны дарга Д.Цогтбаатар ТӨХ-нд олон жил ажилласан ажилтнуудаа шалтгаангүйгээр ажлаас нь халж, тушаалыг нь  үл зөвшөөрсөн нэгэн ажилтан нь Төрийн албаны зөвлөлд өргөдөл гаргасны төлөө ажлын байрандаа зодож, танхайрсан тухай мэдээлэл цацагдаж байсан. Гэвч Д.Цогтбаатар өөрөө энэ асуудалд тайлбар өгсөнөөр тухайн үедээ бас л намжсан. Тэрбээр "Би ажилтантайгаа маргалдаж, муудалцсан нь үнэн. Гэхдээ зодоогүй" гэсэн тайлбарыг өгсөн юм. Гэвч даргын балмад үйлдэл камерийн бичлэгт бий бөгөөд Чингэлтэй дүүргийн шүүхэд нотлох баримт болгон өгсөн гэдгийн эх сурвалж мэдээлсэн юм.

Түүнчлэн өнгөрсөн онд Г.Энх-Амгалан гэх багш шавиа зодож байсан хэрэг олныг цочирдуулсан. Тодруулбал, Г.Энх-Амгалан нь 2010 оны 11-12 дугаар саруудад ОХУ-ын Владивосток хотод аялан тоглолттой байх үедээ бэлтгэл болон тоглолтын үед алдаа гаргалаа гэж ялимгүй зүйлээр шалтаглан 13 настай жүжигчин О-г таяг төмрийг зэвсгийн чанартай хэрэглэн дух руу нь цохиж танхайрсан гэмт хэргийг үйлджээ.
    Мөн 2011 оны арваннэгдүгээр сарын 25-ны өдөр Владивосток хотод, 2010 оны 12 дугаар сарын 18-наас 2011 оны нэгдүгээр сарын 20 хүртэлх хугацаанд Хабаровск хотод, 2011 оны нэгдүгээр сарын 20-ноос хоёрдугаар сарын 26 хүртэлх хугацаанд Красноярск хотод бэлтгэл болон тоглолт дээр алдаа гаргалаа гэж ялимгүй зүйлээр шалтаглан О-г удаа дараа шанаадах, алгадах, үснээс нь зулгааж хана мөргүүлэх, гуя болон чихнээс нь зулгааж, чимхэх, элэгдэх зэргээр байнга зодож, тарчлаасан гэмт хэргийг үйлдсэн байна.
    Үүгээр зогсохгүй 2010 оны арванхоёрдугаар сард ОХУ-ын Хабаровск хотод байхдаа алдаа гаргалаа хэмээн загнаж, хохирогчийн Моторолло маркийн 150.000 төгрөгийн үнэ бүхий гар утсыг хана руу шидэж, бусдын эд хөрөнгийг санаатай устгасан байна. Улмаар энэ багш  3.6 сарын хорих ялаар шийтгүүлсэн.

Энэ мэт төрийн албаныхны ёс бус үйлдэл зарим хүмүүсийн биед нь гэмтэл учруулж байгаад иргэд ихэд шүүмжлэлтэй байгаа юм. Зөвхөн олонд ил гарсан нь л ийм байхад далд маягийн дарангуйлал, гэмт хэрэг хэчнээн ч үйлдэгдэж байгаа нь ойлгомжтой юм.
Ер нь төрийн албаныхны авлига, хүнд суртлаас болж ард иргэд маш ихээр хохирч үлддэг. Гэтэл албан тушаал доогуур ажилчиндаа хүч хэрэглэж байна гэдэг байж боломгүй юм.