Төрийн ажлыг нэр төртэй биелүүлэх,Төрийн албан хаагчийн хуулиар хүлээсэн ёс зүйн хэм хэмжээг чандлан сахих үүрэгтэй уялдуулан, төрийн албанд шинээр орж байгаа албан хаагчид “Төрийн албан хаагч”ийн тангараг өргөж Төрийн жинхэнэ албан хаагч болдог уламжлалтай.

   Төрд зүтгэхээр өөрийн мэдлэг ур чадвараа уралдуулан, Төрийн албан хаагчийн шалгалтыг амжилттай өгсөн ХАХНХЯ-ны болон Хүүхдийн төлөө үндэсний газар, Нийгмийн даатгалын ерөнхий газар, Халамж үйлчилгээний ерөнхий газар зэрэг харьяа агентлагуудын албан хаагчид өнөөдөр Төрийн албан хаагчийн тангарагаа өргөсөн юм.

   Тангараг өргөх ёслолын ажиллагааг УИХ-ын гишүүн, Засгийн газрын гишүүн, ХАХНХЯ-ны сайд С.Эрдэнэ нээсэн. Тэрбээр “Ийм хариуцлагатай цаг, мөчид Та бүхэн Монгол төрийхөө сүлдэнд мөргөж, тангарагаа өргөх гэж байна. Төрд тангараг өргөнө гэдэг бол өөрийнхөө эрхийг тодорхой хэмжээгээр хязгаарлаж, Монгол төрийн өмнө үүрэг, хариуцлага хүлээнэ гэсэн үг юм.

   Мөн Монгол төрийн үйл хэргийг хариуцаж, хэрэгжүүлэх албан хаагчдийн дийлэнх нь залуу боловсон хүчин байгаа нь онцлог байна. Та бүхэн тангараг өргөснөөр эрх мэдэл нэмэгдэх биш, хязгаарлагдаж, төрийнхөө өмнө харицлагатай байхыг эхлэл болно” гэдгийг хэлсэн.

   Төрийн жинхэнэ албан хаагчийн баталгаа болсон тангараг өргөх ёслолд ХАХНХЯ-ны салбар, харьяа агентлагуудын нийт 80 албан хаагч оролцож, эх орон, ард түмнийхээ төлөө оюун ухаан, эрдэм чадлаа зориулж, төрийн хууль ёс зүйн хэм хэмжээг чанд сахиж, албан үүргээ үнэнч шударгаар биелүүлэхээ тангараглалаа.

   Түүнчлэн ХАХНХЯ-ны сайд С.Эрдэнэ “Та бүхэн энэ мөчөөс эхлэн төрийн жинхэнэ албан хаагч боллоо. Энэ бол хүн бүрт тохиох үйл явдал биш гэдгийг ухамсарлах хэрэгтэй. Монгол төрд үнэнч, шударгаар ажиллахаа батлан тангараглана гэдэг ховор хувь заяа юм.

   Тиймээс төр улсынхаа бүрэн бүтэн, тогтвортой байдал, Монгол түмнийхээ ирээдүйн сайн сайхны төлөө өөрөөсөө шалтгаалах бүхнийг хийж, хүч чадлаа дайчлан ажиллана гэдэгт итгэж байна” гээд Монгол төрийхөө ивээл дор, хоёргүй үнэнч сэтгэлээр хариуцсан албаа хашихыг хүсэн ерөөлөө.