Улсын Дээд шүүхийн хяналтын шатны эрүүгийн хэргийн шүүх хуралдаанаар Г.Бошигтод холбогдох хэргийг өнгөрсөн сарын 20-ны өдөр хянан хэлэлцээд анхан болон давж заалдах шатны шүүхээс түүнд оногдуулсан чанга дэглэмтэй хорих ангид 10 жил 1 сар хорих ялыг хэвээр үлдээсэн юм.

Г.Бошигт нь согтууруулах ундааны зүйл хэрэглэсэн үедээ 2013 оны 2 дугаар сарын 3-ны өдөр Чингэлтэй дүүргийн 5 дугаар хороонд буюу гэртээ өөрийн төрсөн хүүхэд болох Х-тэй хувийн таарамжгүй харьцааны улмаас маргалдаж, түүний цээжинд хутгалж, хүндрүүлэх нөхцөл байдалгүйгээр санаатай алсан гэмт хэргийг үйлдсэн юм.

Төрсөн хүүгээ хөнөөсөн этгээд бол МоАХ-г үүсгэн байгуулагчийн нэг, Нэгдсэн хөдөлгөөний тэргүүн асан Г.Бошигт юм. 72 насандаа торны цаана суусан түүнийг МоАХ-ны гишүүд, дэмжигчид нь эргэж байсан юм. Тэгвэл  АНУ-д амьдардаг эхнэр, охин хоёр нь түүнийг хүүгийнх нь ажил явдлаар л эргээд, дахин эргэхгүй гэдгээ хэлээд буцжээ. Харин Г.Бошигтыг өдгөө дүү нь эргэж, тойрч байдаг гэнэ.