Мөрдөх албаны тухай хуулийн шинэчлэлээр Прокурорын дэргэдэх Мөрдөх алба татан буугдаж  АТГ-ын Мөрдөх албатай нэгдэж шинэ бүрэлдэхүүнтэй ажиллах эхлэх талаарх мэдээлэл гараад байгаа. Энэ хүрээнд  Прокурорын байгууллагаас ямар байр суурьтай байгааг УЕПГ-ын орлогч Г.Эрдэнэбатаас тодрууллаа.

-Өнгөрсөн онд Прокурорын дэргэдэх мөрдөн байцаах алба яг хэчнээн хэрэг дээр ажиллаж, шийдвэрлэсэн байдаг вэ?

-Прокурорын дэргэдэх мөрдөн байцаах албан өнгөрсөн жил яллах дүгнэлт үйлдүүлэх саналтайгаар 50 хэргийг, хэрэгсэхгүй болгох саналтайгаар 48 хэргийг Прокурорт шилжүүлсэн. Тэгэхээр 100 гаруй хэргийг шалгаж шийдвэрлэсэн гэсэн үг.  Тэгвэл энэхүү хэргүүдийн 92-96 хувь нь хэрэг бүртгэгч, мөрдөн байцаагч, прокурор, шүүгчийн авлигын гэмт хэрэгтэй холбогдолгүй хууль бус үйл ажиллагаа байдаг. Харин эрүүдэн шүүхтэй холбоотой, шүүн таслах үйл ажиллагааны явцад  эрх мэдлээ хэтрүүлж, урвуулсан, хүний эрх, эрх чөлөөнд халдаж үйл ажиллагаа явуулсантай холбоотой гэх мэт хэргүүд байдаг.

-Прокурорын дэргэдэх мөрдөн байцаах албыг татан буулгаж, АТГ-т нэгтгэнэ гэж яригдаад байгаа энэ дээр ямар байр суурьтай байна?

-АТГ-ын Авлигатай тэмцэх тухай хуульд өөрчлөлт оруулах хийгээд Эрүүгийн байцаан шийтгэх хуульд өөрчлөлт оруулах замаар Прокурорын дэргэдэх мөрдөн байцаах албаны  харьяаллыг шалгадаг. Хууль сахиулах байгууллагын ажилтнууд прокурор, шүүгчийн үйлдсэн авлигын хэргийг АТГ мөрдөн шалгах зорилгоор хэргийн харьяалалд өөрчлөлт оруулах нь ноцтой, болохгүй гэж үзэх зүйл биш. Өөрөөр хэлбэл, Прокурорын дэргэдэх мөрдөн байцаах албаны шалгадаг хэргийн ердөө 6-8 хувийн хэргийн харьяалал АТГ-руу шилжих болно гэсэн үг. Цаана нь байгаа жил тутамд үйлдэгддэг 90 орчим хэргийг өөр ямар нэгэн алба шалгах үндсэндээ боломжгүй  байгаа. Тухайлбал, цагдаагийн байгууллагаар цагдаагийн алба хаагчийн хууль бус үйл ажиллагааг шалгуулахад төвөгтэй. Харин шүүгч, прокурорын хувьд хүний эрх, эрх чөлөөнд халдсан, эрүүдэн шүүсэн гэх мэт гэмт хэргүүдийг үйлдсэн тохиолдолд боломжтой. Тиймээс сонирхолын зөрчлийг илэрхийлэхийн тулд АТГ-ын мөрдөн байцаах алба прокурор, шүүгчийн үйлдсэн авлигын гэмт хэргийг мөрдөн шалгахад Прокурорын байгууллагын зүгээс татгалзаад байх зүйл байхгүй. Гагцхүү Прукрорын дэргэдэх мөрдөн байцаах албаны хэрэг бүртгэгч, мөрдөн байцаагч, бусад хууль сахиулах албаны ажилтнууд өөрсдөө авлигын хэрэг үйлдвэл хэн шалгах вэ гэдэг асуудал байгаа. Хэрвээ энэ асуудлыг зөвөөр зохицуулаад АТГ-ын дэргэдэх мөрдөн шалгах албаны болон бусад албан тушаалтны авлигын хэргийг зохих байгууллагад нь  харьяалуулан шилжүүлвэл илүү ухаалаг шийд болно гэсэн байр суурьтай байна.