Чингэлтэй дүүргийн 5-р хорооны нутаг дэвсгэрт баригдаж байгаа “Макс Өргөө” ХХК-ны барилга дээрээс бэхэлгээний төмөр замын хөдөлгөөнд оролцож явсан "3139" УНР улсын дугаартай "Ланд Круйзер 200" маркын авто машиныг цөмлөн унаж хүний аминд хүрсэн. Тэгвэл энэ хэрэгт хуулийнханыг үнэн зөвөөр ажиллаж чаддах нь уу, яг ял авах ёстой хүмүүст  "бодитой" ял оноож чадаж байна уу гэдгийг  иргэд анхааралтай ажиглаж байгаа. Тэр дундаа "Макс Өргөө" ХХК-нд хатуу хариуцлага тооцож, тухайн барилгын ажлыг нь нураах хүртэл арга хэмжээ авахыг хүмүүс шаардаж байгаа.

Харин нөгөө хэсэг "Макс Өргөө"-ийн хөдөлмөр аюулгүй байдлыг инженер, удирдлагуудад хэрэг үүсгэх ёстой ч гэж үзээд байна.

Юутай ч барилгын ажил хийж байгаа бүх газар гүйцэтгэгч болоод захиалсан байгууллагаас нь хөдөлмөр аюулгүй байдлын тусгай инженер томилогдсон байх ёстой. Мөн барилгын хүнд ажлуудыг арваннэгдүгээр сараас хойш үргэлжлүүлэх ёсгүй байдаг. Түүнчлэн хэрэв захиалагч болоод ажлыг гүйцэтгэгч компани хөдөлмөр аюулгүй байдлын инженерээр хянуулж ажлаагүй бол удирдлага, захирлуудад нь эрүүгийг хэрэг үүсгэх бүрэн боломжтой байдаг тухай цагдаагийн байгууллагынхан хэлээд байгаа.

Дашрамд хэлэхэд энэ хэрэг Барилга, хот байгуулалтын яамыг буруутгах хүмүүс ч олширсоор байна. Учир нь энэхүү компани 16-аас дээш давхар барилгуудын зөвшөөрлийг өгч, хянаж ажиллах үүрэгтэй. Мөн МХЕГ-аас ч тухайн барилгад хяналт тавьж ажиллаж шаардлагатай байсан билээ.

Тэгвэл нийслэлийн Засаг дарга Э.Бат-Үүл “Засгийн газрын 2012 оны тогтоолын дагуу 16 давхраас дээш барилгын зөвшөөрөл, хяналтыг Барилга, хот байгуулалтын яам, Мэргэжлийн хяналтын Ерөнхий газар хариуцдаг болсон. Гэвч тэдгээр барилгууд нийслэлийн нутаг дэвсгэрт баригдаж байгаа учраас бид анхаарал хандуулах хэрэгтэй. Өмнө нь Тэнгис кино театрын урд талд баригдаж буй барилгаас мөн л төмөр унаж,  эрдэнэт хүний амь нас  эрсэдсэн харамсалтай хэрэг гарсан. Тус барилгын зөвшөөрлийг цуцалж, үйл ажиллагааг нь зогсоосон ч Засгийн газрын дээрх тогтоолоор Барилга, хот байгуулалтын яам зөвшөөрөл олгож, үргэлжлүүлэн баригдаж эхэлсэн. Сая осол гарсан энэ барилгад хуулийн мөн л яам, Мэргэжлийн хяналтын Ерөнхий газар хяналт тавих үүрэгтэй. Тиймээс хуулийн байгууллагад шилжсэн энэ хэрэгт холбогдох хүмүүс хяналт тавин  ажиллах хэрэгтэй. Хэн ч байсан хариуцлагаас мултрах учиргүй“ гэдгийг тодотгон хэлсэн юм.

Ямартаа ч Макс өргөө компанийн үйл ажиллагааг зогсоох тушаалыг МХЕГ-аас өнгөрсөн онд гаргаж байсан ч зөрчлөө арилгалгүйгээр ажлаа эхлүүлсэн нь ийн осол гарахад нөлөөлсөн юм. Мөн  ингэж хууль зөрчин ажиллаж байхад  Мэргэжлийн хяналтын байгууллагаас Улсын байцаагчийн гаргасан актын биелэлтэнд хяналт тавиагүйгээс дээрх осол гарсан байдаг.

Тэгэхээр энэ хэрэгт "Макс Өргөө", Барилга, хот байгуулалтын яам, МХЕГ ч буруутай болж таарч байгаа юм.