Энэ долоо хоногт гарсан гэмт хэргийн тоймыг хүргэж байна. Тухайлбал, "Гал үндэстэн" холбооны тэргүүн Ц.Мөнхбаярын шүүх хурал хойшлож, Генерал Т.Дашдэлэг ялаа авчээ. Энэ мэт онцлох хэргүүдийн долоо хоногийн тоймыг хүргэж байна.

    Малайзад амиа алдсан охины гэрийнхэн Х.Тэмүүжин сайдад хандана
Манай улсын 25 настай иргэн Н.Энхтуяа Малайзад бусдын гарт амиа алдаад байгаа. Талийгаачийн гэр бүлийнхэн болон Гадаад харилцааны яам, Консулын газар хамтарсан баг тус улсыг зориод ирсэн.
Малайз руу яваад ирснээс хойш уг хэрэг нам жим болоод байгаа. Тухайн хэрэг дээр манай улсын Консулын газар, Гадаад харилцааны яам хэрхэн ажиллаж байгаа нь тодорхойгүй байгаа. Тэгвэл энэ сарын 7-нд ЦЕГ, УМБГ-тай охины ар гэрийнхэн  уулзаж, хэрэг явдлын талаар ярилцжээ. Мөн талийгаачийн гэр бүлийн зүгээс  Хууль зүйн сайд Х.Тэмүүжинд хандаж хэргийг үнэн мөнөөр шийдэж өгөхийг хүссэн захидал илгээхээр болсон байна.

Хип хопчин гэх 15 залууд хар тамхи зарсан гэх иргэдийг эрэн сурвалжилж эхэлжээ
Улсын мөрдөн байцаах газрын Зохион байгуулалттай гэмт хэрэг мөрдөх хэлтсийнхэн  хип хопчид цугладаг нэгэн дуу бичлэгийн студид  оны өмнөхөн нэгжлэг хийсэн тухай бид мэдээлсэн. Тус студи нь  Баянгол дүүргийн дөрөвдүгээр хорооны нутаг дэвсгэрийн  дөрөвдүгээр байрны хоёр дахь орцны хонгилд байрладаг байсныг эх сурвалжууд нотолсон
Улмаар нэгжлэгийн үеэр тухайн студиэс эрэлч нохойн тусламжтай хар тамхи мансууруулах бодис олсон байдаг. Одоогоор тухайн хэрэгт холбогдуулж хип хоп чиглэлээр дуулдаг гэх 15 залуугаас мэдүүлэг авч байгаа юм.  Тэд  тухайн үед ямар нэгэн мансууруулах төрлийн бодис хэрэглээгүй байсан бөгөөд нэгжлэг хийх үеэр "Ice" нэртэй хар тамхи, мансууруу-лах үйлчилгээтэй өвс тус бүр нэг грамм байсныг нотлох баримт болгон хурааж аваад байгаа юм.
Юутай ч зарим эх сурвалжийн мэдээлж буйгаар тэдэнд  хар тамхи зардаг байсан гэх хоёр залууг эрэн сурвалжилж байгаа аж.  Мөн тухайн байрыг түрээсэлдэг хэсэг залуусыг ч цагдаагийнхан саатуулжээ.

Барилгаас төмөр унасан хэрэгт эрүүгийн хэрэг үүсгэлээ
Чингэлтэй дүүргийн 5-р хорооны нутаг дэвсгэрт баригдаж байгаа “Макс Өргөө” ХХК-ны барилга дээрээс бэхэлгээний төмөр замын хөдөлгөөнд оролцож явсан "3139" УНР улсын дугаартай "Ланд Круйзер 200" маркын авто машиныг цөмлөн унаж хүний аминд хүрсэн. 

Энэ хэрэгт Чингэлтэй дүүргийн Цагдаагийн хэлтсийн мөрдөн байцаагч ахмад  Б.Батсүрэн Монгол Улсын Эрүүгийн хуулийн тусгай ангийн 183 дугаар зүйл 183.1 дэх хэсэгт зааснаар эрүүгийн хэрэг үүсгэн шалгаж байна.

Ц.Мөнхбаяр нарын шүүх хурал 12 хоногоор хойшиллоо
"Гал үндэстэн” холбооны хэд хэдэн гишүүнд холбогдох хэргийг шүүх хурал  Ганц худаг дахь урьдчилан хорих төвд эхэлсэн ч нэг өмгөөлөгч ирээгүй учир хойшилжээ.

Тодруулбал, Ц.Мөнхбаяр нарыг шүүх хурал энэ сарын 20-ныг хүртэл хойшилжээ. Учир нь Ц.Мөнхбаяр, Д.Төмөрбаатар, Г.Болдбаатар нарын өмгөөлөгч н.Бэхбат эрүүл мэндийн шалтгааны улмаас шүүх хуралд хүрэлцэн ирээгүй учир шүүгдэгчид хурлыг хойшлуулах хүсэлтийг шүүх бүрэлдэхүүнд гаргажээ. Шүүх бүрэлдэхүүн хүсэлтийг хүлээн авч, ийнхүү хурлыг хойшлуулсан байна.

Дашрамд хэлэхэд, шүүх хуралд “Гал үндэстэн холбоо”-ны гишүүд болоод тэдний дэмжигчид оролцохоор очсон бөгөөд өөрсдийн саналаа илэрхийлсэн байна.

Г.Хэрлэнг ажлаас нь чөлөөлөхөөр яригдаж эхэллээ
Төрийн албаныхан хоорондоо зодолдож, арай тушаал бага нэгнээ дарамтлах үзэгдэл өнгөрсөн онд цөөнгүй гарсан. Тэгвэл өнгөрсөн сард бас нэгэн ийм төрлийн хэрэг хав дарагдаад өнгөрчээ. Тодруулбал,   Санхүүгийн зохицуулах хорооны дэд дарга Г.Хэрлэн тус хорооны хэлтсийн  дарга Ц-г бусадтай бүлэглэн зодож, танхайрсан хэрэг өнгөрсөн сарын 26-нд гарсан байна. Эх сурвалжийн мэдээлж буйгаар зодуулсан гэх иргэн Ц нь цагдаагийн байгууллагад энэ дагуу өргөдөл, гомдол мэдүүлсэн байсан ч төд удалгүй гомдолгүй хэмээн хэргийг хаалгажээ.Тэгвэл энэ асуудал бүр даамжирч эхэллээ. Тодруулбал, Г.Хэрлэнг ажлаас нь чөлөөлөхөөр болсон аж. Мөн ажилтнаа бүлэглэн зодсон энэ асуудал Засгийн газрын түвшинд хүртэл яригдаж эхэллээ.

Д.Дорлигжавын нэрийг барьж 15 сая гаруй төгрөг залилсан
Баянгол дүүргийн  харъяат Хийморьсүрэн овогтой Золбоо гэгч эмэгтэй Улсын Ерөнхий  Прокурор Д.Дорлигжавын нэрийг барьж залилан хийсэн хэрэг гарсан. Тэрээр өөрийгөө “Увс аймгийн Зүүнговь сумын иргэн,  Улсын  Ерөнхий Прокурор Д.Дорлигжавын дүү” хэмээн  танилцуулж, төрийн алба болон бусад ямар ч газар, ажилд саадгүй зуучилна гэж залилсан. Улмаар иргэн Д.Цагаанхүүгээс таван сая төгрөг, М.Баянжаргалаас 6000 ам доллар бэлнээр авсан байна. Түүнд мөнгөө өгсөн дээрх хоёр хүн хэсэг хугацааны дараа залилуулсан болохоо мэдэж мөнгөө нэхэхэд тэрээр  “Буух эзэн, буцах хаягтай бүү санаа зов  гэж байснаа сүүлд нь  “Би хоёр сартай жирэмсэн. Та нар мөнгө нэхэж дарамтлаад байхаар миний хүүхэд зулбах гээд байна дахин бүү ярь” гэж хэлээд утсаа авахаа больсон гэсэн.Одоогоор Х.Золбоо гэгчид хэчнээн хүн залилуулсан нь тодорхойгүй байна. Харин түүний үйлдэлд Баянгол дүүргийн цагдаагийн нэгдүгээр хэлтсийн Мөрдөн байцаах албанаас Эрүүгийн Хуулийн тусгай ангийн 148 дугаар зүйлийн 148.2-т  зааснаар эрүүгийн хэрэг үүсгэн шалгаж байгаа.

Генерал Т.Дашдэлэгт 3.5 жилийн ял оноолоо
Зэвсэгт хүчний жанжин штабын Агаарын довтолгооноос хамгаалах цэргийн командлагч асан, баригадын генерал Т.Дашдэлэгийг 2011 онд цэргийн ангид ашиглаж байсан байлдааны сөнөөгч бөмбөгдөгч "Миг-21" онгоцыг хуваан, их биеийг нь төмөр хайлуулах үйлдвэрт тушаасан, мөн моторыг нь БНАСАУ-д худалдахыг завдсан байж болзошгүй хэрэгт буруутгаад байгаа юм. Түүнчлэн, БНАСАУ улсын зүгээс  онгоцныхоо моторыг хүлээлгэж өгөөгүй учир манай улсад шилжүүлсэн гэх 1.5 сая ам.доллараа эргүүлэн авахаар хандсан нь эл хэргийг ил болгосон.

Тэгвэл Т.Дашдэлэг нарт холбогдох анхан шатны шүүхээс тэднийг албан тушаалаа урвуулан ашиглаж, бусдын эд хөрөнгийг завшиж үрэгдүүлсэн хэрэгт буруутай болохыг тогтоож Т.Дашдэлэгт 3.5 жилийн хорих ял, н.Бямбаноровт 7.1 жил, н.Сэргэлэнбаатарт 5.1 жилийн хорих ялыг жирийн дэглэмтэй хорих ангид эдлүүлэхээр  тус тус шийтгэсэн байна.