Манай улс болон урд хөршид цагаан сар болох гэж буйтай холбоотойгоор амар хялбар аргаар ашиг олохыг завдагсад улсын хилээр эд  зүйл хууль бусаар нэвтрүүлэхийг оролдох явдал нэлээд олшрох төлөвтэй байгааг албаныхан хэлээд буй.  Он гараад хэдхэн хонож байхад л хэд хэдэн ноцтой хэргүүд илэрснийг тоймлон хүргэж байна.

    Малын өлөн гэдэс, бугын эвэр, чив, улаан гоёо зэргийг оруулахыг завдлаа

Хилийн тагнуулын газрынхан ЭЦГ-ын ажилтнуудтай хамтран ноцтой хэрэг өнгөрсөн долоо хоногт илрүүлсэн юм. Тодруулбал, Монгол Улсын иргэн Ж нь Замын-Үүдийн Авто замын шалган нэвтрүүлэх боомтоор ойролцоогоор 500 орчим сая төгрөгийн үнэт чулуу, ховор ургамал, түүхий эдийг 40 тоннын чингэлэгт нууц хана хийж, түүндээ нуун БНХАУ руу нэвтрүүлэхийг завдсан гэнэ. Тэрбээр уг чингэлэгт байгалийн өнгөт чулуу 215 шуудай, зээрийн мах 158 шуудай, чулуужсан мод 250 килограмм, ногоон хаш чулуу дөрвөн тонн, бог малын өлөн гэдэс 200 шуудай, бугын хоёр чив, улаан гоёо 150 шуудай, үзмэн мана нэг тонныг нуусан байжээ. Тэгвэл энэ талаар  ГЕГ-ын албаны хүнээс тодруулахад " Гөрөөс, чонын мах зэрэг агнахыг хориглосон ангийн мах байсан. Бусад байгалийн чулуу зэрэг байгаагүй. Харин хууль бус бараа тав орчим шуудай байсан" гэв.

Сэжигтэн Ж уг чингэлгийн хананаас дотогш хоёр метр зайд дотрынх нь өнгөтэй адил өнгөөр давхар хана хийсэн байсан нь хууль хяналтын байгууллагынхны шалгалтаар тогтоогджээ. Баттай эх сурвалжийн мэдээлснээр гаалийн үзлэг шалгалт хийж дууссаны дараа хилчид уг үйлдлийг илрүүлсэн байна. Тиймээс гаалийн ажилтнууд энэ хууль бус үйлдэлд холбоотой байж болзошгүй гэсэн хардлагыг  төрүүлээд байгаа юм.

Тиймдээ ч цагдаагийн байгууллага түүнд тусалсан байж болзошгүй Замын-Үүдийн гаалийн улсын байцаагч Э-г сэжигтнээр тооцон цагдан хорьсон аж. Шалгалтын явцад Э нь тус боомтын даргаар ажиллаж байсан Л-ын өгсөн үүргийн дагуу Ж-ын чингэлэгтэй автомашиныг шалгалгүй гаргахын тулд гаалийн бүрдүүлэлтэд тамга дарсан нь тогтоогдож буй гэнэ.

1.8 тэрбумын 176 хайрцаг цэнэглэгч карт хуурамчаар хийжээ

Мөн энэ сарын 8-нд дээрх боомтоор Монгол Улсын иргэн Б, Э, Л нар БНХАУ-ын Эрээн хотоос “Ланд круйзер-80” маркийн суудлын гурван автомашинаар үүрэн холбооны 176 хайрцаг цэнэглэгч карт хилээр  оруулж ирж байгаад саатуулагджээ.  Тэдний авч явсан бараанд  1000 болон 2500 төгрөгний цэнэглэгч карт тус бүр  400000, 5000 төгрөгийн карт 80000 ширхэг, нийт 1.8 тэрбум төгрөгийн нэгжийн карт, ширээний хуанлийн хавтас байсан аж. Эдгээрийг гаалийн хяналт  шалгалтанд оруулалгүй, татвараас зайлсхийн улсын хилээр оруулахыг завдсан юм. Юутай ч энэ талаар "Мобиком"ын холбогдох мэргэжилтнээс тодруулахад ”Одоогоор бидэнд энэ талаарх мэдээлэл ирээгүй байна. Хэрэв үнэхээр бидний цэнэглэгч картны бэлдэц оруулж ирж, карт хийж зардаг байсан бол энэ нь олон асуудлыг дагуулах болно” гэснээс өөр хариулт өгсөнгүй. Харин өөр нэгэн эх сурвалжийн хэлж буйгаар тухайн машиныг Д.Байгалмаа, Д.Алимаа, У.Эрдэнэхүү гэх гурван эмэгтэй жолоодож явсан аж. Харин ачааных нь эздээр Баянзүрх дүүргийн гурван иргэнийг холбогдуулан шалгаж байгаа юм байна. 

"Iphone" утсыг Эрээнд аваачиж серийн дугаарыг нь өөрчилдөг байжээ

Түүнчлэн "Iphone" төрлийн гар утас алдагдсан ч мэдээлэл дамжуулдаг, хаяг байршлаа тодорхойлдог мэдрэгчтэй хэмээдэг. Тэгвэл энэ төрлийн утсаа алдсан 300 гаруй иргэн цагдаагийн байгууллагад хандаад байгаа аж.  Гэвч албаныхан тухайн утаснаас ямар ч тохиолол хүлээж авч чадахгүй мухардалд ороод байсан ч ямар учиртайг нь олж тогтоожээ. Тодруулбал,  халаасны хулгайчид  утаснуудыг хулгайлсныхаа дараа Монголд асаалгүй, БНХАУ-ын Эрээн хотод аваачин серийн дугаарыг нь өөрчлүүлж, буцаан авчирч өндөр үнээр худалдаалдаг байсан нь илэрсэн юм.