21 настай найз охиныгоо 48 цагийн турш зодож хөнөөсөн гэх Г.Алтанхүүг өдгөө Цагдан хорих 461-д саатуулан шалгаж байгаа. Түүний хэргийг Сүхбаатар дүүргийн цагдаагийн хоёрдугаар хэлтэс дээр шалгаж, Прокурорын байгууллагаас хянаж байгаа.

Мөн Г.Алтанхүүд эрүүгийн хуулийн тусгай ангийн 91-р зүйл ангиар эрүүгийн хэрэг үүсгэсэн байгаа юм. Харин одоогоор ар гэрийнхэн болоод ойр тойрныхноос нь мэдүүлэг авч байгааг албаныхан хэлж байгаа билээ.

Түүнийг 48 цагийн турш найз бүсгүйгээ зодож хөнөөсөн гэхээр нэг хэсэг сэтгэцийн өвчтэй байх магадлалтай гэх яриа гарч байсан.  Тиймээс хоригдож байх хугацаанд нь сэтгэцийн эмч мэдрэлийг нь шалгаж, мөн тусгай сэтгэлзүйч түүнд үйлчилж байгаа юм.

Түүнчлэн хохирогчдын талаас талийгаачийн цогцсыг шинжилсэн шижээчдийн эхний дүгнэлтийг хүлээн зөвшөөрөөгүй учир дахин шинжээчдийн баг томилсон байдаг. Тэгвэл шинэ шинжээчдийн багийн дүгнэлт хараахан гараагүй байгаа хэдий ч хүмүүс өмнөхтэйгээ адил гарна хэмээн таамаглаж эхэлсэн юм.

Учир нь Г.Алтанхүүг 48 цагийн турш буюу хоёр өдөр зодсоор байгаад найз охиноо хөнөөсөн бус бага багаар яргалж, тамалсаар байгаад биеийг нь муутгасан байж болзошгүй гэж таамаглах хүн олон байна. Тодруулбал, Г.Алтанхүүг угийн түргэн уур уцаартай, хартай хүн аж. Тиймээс уурлаж бухимдаж, бага багаар гар хүрч зовоосоор байгаад охины бие муудаж, цөсны цорго нь үрэвсэж нас барсан байж болзошгүй гэж үзэх иргэд цөөнгүй байгаа юм.

Харин өөр нэгэн эх сурвалжийн хэлж буйгаар “Б.Цэдэн-Иш буюу Г.Алтанхүүгийн найз бүсгүй өөр нэг залуутай учир ургуулсан. Харин түүнийг нь мэдсэн Г.Алтанхүү дөрвөн өдрийн турш тамлан зовоож, дарамталж, стресстүүлсэн. Тэгснээр охины цөсний цорго үрэвсэж үхэлд хүргэсэн байж болзошгүй” гэв. Тэгэхээр энэ бүхэн үнэний ортой бол хэдхэн хоногийн дараа гарах шүүх шинжилгээний хариу яг л өмнөхийгөө давтаж магадгүй байдалтай байгаа юм.  Мөн  Г.Алтанхүүгийн ар гэрийнхэн шууд зодсоор байгаад хөнөөгөөгүй хэмээн гомдолтой байгааг ч үгүйсгэхгүй.

Юутай ч Г.Алтанхүү хоёр өдрийн турш зодож,  хөнөөгөөгүй байсан ч хүнийг үхэхд хүргэсэн учир ялаа авч, хэргээ үүрэх учиртай. Тиймээс ч долоо хоногийн дараа гарах охины шинжилгээний хариуг хүмүүс анхааралтай ажиглаж байна.