Улсын Дээд шүүхийн хяналтын шатны захиргааны хэргийн шүүх хуралдаанаар “Баянгол тохижилт” ХХК , “Баянзүрх тохижилт” ХХК, “Сонгинохайрхан дүүргийн тохижилт үйлчилгээ” ХХК,   “Сүхбаатар тохижилт” ХХК, “Хан-Уул дүүргийн тохижилт үйлчилгээ” ХХК-иудын нэхэмжлэлтэй Нийслэлийн өмч хувьчлалын комисст холбогдох хэргийг хариуцагчийн итгэмжлэгдсэн төлөөлөгчийн гомдлын дагуу өчигдөр хянан хэлэлцлээ.

Нэхэмжлэгчид Нийслэлийн өмч хувьчлах комиссын 2013 оны 1 дүгээр сарын 30-ны өдрийн 1, 2, 3, 4, 5 дугаар тогтоолуудыг хүчингүй болгуулах нэхэмжлэлийн шаардлагыг гаргажээ. Дээрх тогтоолуудаар  уг таван дүүргийн тохижилт үйлчилгээний  компанийн хувьчлалыг мөн оны 2 дугаар сарын 1-ний өдрөөс эхлэн хүчингүй болгосон юм.

Нийслэлийн Захиргааны хэргийн шүүх энэ хэргийг 2013 оны 7 дугаар сарын 15-ны өдөр анхан шатны журмаар хянан хэлэлцээд Төрийн болон орон нутгийн өмчийн тухай хуулийн 34 дүгээр зүйлийн 1-ийн 6, 62 дугаар зүйлийн 1-ийн 5, 6, 7, 8, 9-д заасныг баримтлан нэхэмжлэгч Баянгол, Баянзүрх, Сүхбаатар, Сонгинохайрхан, Хан-Уул дүүргийн Тохижилт үйлчилгээ ХХК-иудын нэхэмжлэлийн шаардлагыг бүхэлд нь хангаж шийдвэрлэжээ.

Захиргааны хэргийн давж заалдах шатны шүүх мөн хэргийг 2013 оны 11 дүгээр сарын 21-ний өдөр хянан хэлэлцээд анхан шатны шүүхийн шийдвэрийг хэвээр үлдээсэн аж.

Улсын Дээд шүүхийн хяналтын шатны захиргааны хэргийн шүүх хуралдаанаар дээрх хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээв.