Шинэ Засгийн газар байгуулагдснаас хойш төрийн биш төрлийн алба гэдэг толгой холбосон үг моданд ороод байна. Дүүгээ, ахыгаа, эхнэр, хүүхдээ зөөлөн суудалтай албанд томилуулчихаад ичих ч үгүй яваа УИХ-ын гишүүд, сайд нарын тоо нэмэгдсээр.  Тодруулбал Улсын прокурорын ерөнхий газар, ГЕГ, Гадаад харилцааны яам бүгд төрийн албыг төрлийн алба болгосон гэхэд болно.

Тэгвэл үүн дээр нэмэгдээд Татварын ерөнхий газар андын холбоогоор бүрдсэн газар болж хувирчээ.  Ингээд та бүхэнд андын холбоо сүлбээгээр ажлын хамт олноо бүрдүүлсэн Татварын ерөнхий газрын албан томилгооны жагсаалтыг хүргэж байна.

1.  ТЕГ-ын даргын үүрэг гүйцэтгэгч Т.Батмагнай хууль зөрчин түр орлон гүйцэтгэгчээр иржээ.

2. ТЕГ-ын Төрийн захиргаа, удирдлагын газрын үүрэг гүйцэтгэгч С.Орхон Т.Магнайтай хамт магистрантурт нэг ангид сурч байсан.

3. ТЕГ-ын Бизнесийн зөвлөлийн дарга, ТЕГ-ын даргын орон тооны бус зөвлөх А.Тамир Т.Батмагнайгийн сайн найз бөгөөд С.Орхон, Т.Батмагнай, Б.Даваацэрэн нартай хамтран  аж, ахуй нэгж, төрийн бус байгууллагуудыг ажиллуулдаг.

4. ТЕГ-ын Хяналт шалгалт, арга зүйн газрын даргын үүрэг гүйцэтгэгч Б.Даваацэрэн нь Т.Батмагнайгийн хамт Санхүү, эдийн засгийн техникумын нэг ангид суралцаж төгссөн.

5.   ТЕГ-ын Улсын төсвийн орлого хяналтын газрын даргын түр орлон гүйцэтгэгч Б.Даваацэрэн Т.Батмагнайтай хамт Санхүү, эдийн засгийн техникум төгссөн дотны  андынх нь нэг.

6. ТЕГ-ын Татвар хураалтын  газрын дарга Б.Цогтнаран Т.Батмагнайг “Чингис хаан” банкны дэд захирлаар ажиллаж байхад нь тус банкийг  хариуцсан татварын улсын байцаагч байжээ.

7. ТЕГ-ын Татварын удирдлага, хамтын ажиллагааны газрын дарга Б.Бадрал Т.Батмагнайгийн зөвлөх бөгөөд бизнесийн хамтрагч А.Тамирынх нь найз.

8. ТЕГ-ын Эрсдэлийн удирдлагын газрын дарга Б.Хүрэлчулуун Т.Батмагнайтай банкны нэг салбарт хамт ажиллаж байсан.

9.  Нийслэлийн Татварын газрын Хяналт шалгалтын хэлтсийн татварын улсын ахлах байцаагч Ц.Баярхүү Т.Батмагнайтай хамт Санхүү, эдийн засгийн техникумыг 1994 онд төгссөн.

10. Чингэлтэй дүүргийн  Татварын хэлтсийн даргын үүрэг гүйцэтгэгч М.Болортуяа Б.Батмагнайтай хамт нэг сургууль төгссөн аж. Энэ мэтээр түүний анд нөхдүүд Татварын газраар нэг тархжээ.