Эрүүгийн цагдаагийн газрын Хүн худалдаалах гэмт хэрэгтэй тэмцэх чиглэлээс АНУ-ын иргэн И гэгч нь Улаанбаатар хотын шөнийн цэнгээний газруудад тайчих үзүүлбэр үзүүлдэг монгол охидыг Номхон далайд орших Сайпан арал руу худалдаалах гэж байсныг илрүүлсэн талаар бид мэдээлсэн. Тодруулбал, Эрүүгийн цагдаагийн газрынхан ТЕГ-ын Сөрөх тагнуулын газар, УМБГ-тай  хамтран Хан-Уул дүүргийн 9-р хорооны нутаг дэвсгэрээс  сэжигтэн АНУ-ын иргэн И- г  баривчилсан байдаг. Эрүүгийн цагдаагийн газрынхан охидыг Сайпан арал руу худалдаалахаар бэлтгэж байгаа талаарх мэдээллийг таван сарын хугацаанд баримтжуулсны эцэст сэжигтэй этгээдийг ийнхүү саатуулсан нь олны талархалыг хүлээсэн.

Тэгвэл одоогоор хэрэг аль шатандаа явааг, мөн гадны улсын иргэн манай улсад гэмт хэрэг хийсэн тохиолдолд хэрхэн зохицуулдагийг УМБГ-ын албаны эх сурвалжаас тодрууллаа. Тэрбээр "АНУ-ын иргэн И гэгч манай улсын 11 охиныг худал хэлж Сайпан гэх арал руу аваачиж худалдаж, биеийг нь үнэлүүлэхээс бид сэргийлж чадсан. Саатуулагдсан иргэн монгол охидыг өндөр цалинтай ажилд зуучилна гэж гэрээ хийгээд гэрээний харилцааг далимдуулан элсүүлэлт явуулж хилээр гаргах гэж байсан. Дээрх хэргийн хохирогч охидууд хүн худалдаалах гэмт хэрэгт өртөж буйгаа мэдээгүй байсан. Улмаар тэд хуулийн байгууллагад ирснийхээ дараа ямар асуудалд орсноо ойлгож, гадагшаа явахаас татгалзсан. Мэдээж охидоос мэдүүлэг авсан байгаа. Харин АНУ-ын иргэн И-г АНУ-ын хуулийн байгууллагад хүсэлт гаргаж, учир байдлаа тайлбарлаж Монгол руу шилжшүүлсэн. Тиймээс АНУ-ын иргэн И-г Монголд шалгахаар болж, хэргийг нааш шилжүүлсэн. Мөн эхнэр гэх бүсгүйг нь ч байцааж байгаа" гэв.

АНУ-ын иргэн М нь 2008 оны наймдугаар сарын 18-нд Монголд ирж, Монгол Улсын иргэн Ө-тэй хамтран амьдарч, хоёр хүүхэдтэй болжээ. Түүний амьдарч байсан газарт үзлэг хийхэд цүнх, эд зүйлсээс нь Сайпан арал руу хил давуулахаар зэхэж, бэлтгэсэн 11 монгол охины бичиг баримтаас гадна шинээр таван охины визэнд орох материал, охидын нүцгэн фото зургууд олдсон гэдэг. 

Тэрбээр 2006 оноос хойш хэд хэдэн удаа Сайпан арал руу монгол охидыг хил давуулан худалдаалсан, хамтран амьдрагч Ө, түүний төрсөн дүү нарыг ч Сайпан арал руу тайчих үзүүлбэр үзүүлэх нэрээр гаргаж байсан талаараа цагдаагийнханд мэдүүлжээ.

Эл хэрэг хачир болгож нэгэн мэдээллийг хүргэхэд охидыг зардаг байсан гэх америк эр “Голден бридж”-ийн багш байсан гэдэг. Гагцхүү “Голден бридж”-ийн удирдлагууд түүний гэмт үйлдлийг мэддэг байсан уу, үгүй юу гэдэг олны анхаарлыг татаж буй. Мөн тэрбээр тус төвд суралцагч охидоос гэмт хэргийн золиос болгож байсан уу? гэдэг асуулт ч гарч ирж байгаа юм.