“Гал үндэстэн” холбооны тэргүүн Ц.Мөнхбаяр нар Дүүргийн эрүүгийн хэргийн давж заалдах шатны 10 дугаар шүүхэд  өнгөрсөн сарын 27-ны өдөр гомдол гаргажээ. Ийнхүү Ц.Мөнхбаяр нар нь давж заалдах шатны шүүхэд гомдол гаргаснаар Дүүргийн эрүүгийн хэргийн давж заалдах шатны 10 дугаар шүүхээс хурлын товыг хуульд заасан хугацаа буюу 30 хоногийн дотор товлож шүүх хурлыг хийх юм байна.

Түүнчлэн Ц.Мөнхбаяр нарын зэвсэг авсан иргэнийг саатуулаад байгаа. Тиймээс Ц.Мөнхбаяр нарт зэвсгийн хэргээх дахин шинэ хэрэг үүсгээд байгаа юм.

Гагцхүү Ц.Мөнхбаяр нарын ялын хэмжээнд зарим хүмүүс бухимдлаа илэрхийлж байгаа. Тэгвэл энэ талаар Д.Дорлигжав прокурор хэлэхдээ "Ц.Мөнхбаяр нар эрүүгийн хуулийн 177 дугаар зүйл ангид заасны дагуу шийтгүүлсэн байгаа. Хуулийн байгууллага, шүүх, прокурор өнөөдөр үйлчилж байгаа Эрүүгийн хуулийн хүрээнд л ажиллана. Тэгэхээр Эрүүгийн хуулийн 177 дугаар зүйлд Эрх бүхий байгууллага, албан тушаалтныг тодорхой шийдвэр гаргуулах, эсвэл шийдвэр гаргуулахгүй байхын тулд түүнд нөлөөлөх зорилгоор олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хүч хэрэглэхээр завдсан бол энэ зүйл ангиар шийтгэгдэнэ. Үүнийг бүлэглэж үйлдсэн бол хүндрүүлэх нөхцөл байдлаар шийдэхээр Эрүүгийн хуульд заасан байдаг. Энэ хүмүүс төрийн байгууллагыг шийдвэр гаргуулахын тулд олны нүдэн дээр буу шийдэм барьж, тэсэрч дэлбэрэх бодис авч нөлөөлөх оролдлого хийснийг бид мэдэж байгаа. Ганцаараа биш олуулаа энд тэндээс аюултай зэвсэг олж ирсэн нь нотлогдсон. Хэрвээ ял хүндэрч байна гэвэл үүнийг нь одоо хэлэлцэх гэж байгаа шинэ Эрүүгийн хуулиар авч үзнэ үү гэхээс биш одоо байгаа хуулиар аль ч байгууллага ингэж л шийднэ" гэлээ.