УИХ-ын Төсвийн байнгын хороо өнөөдөр нээлттэй хуралдаж байна. Тус хуралдаанаар төсөвт өртөг нь нэмэгдсэн гэх шалтгаанаар царцаагаад буй 234 барилгад хийсэн аудитын шалгалтын дүгнэлттэй танилцаж байна.


Ээлжит бус чуулган энэ сарын 20-нд хуралдах бөгөөд өнөөдрийн хуралдааны дүгнэлтийг  танилцуулах юм. Аудитын Ерөнхий газрын мэдээлж буйгаар царцаасан 272 барилгаас 23 обьектыг цааш нь үргэлжлүүлэх шаардлагагүй болсон байна Үүнээс 7 барилгыг дуудлага худалдаагаар худалдах аж.

Харин бусад 249 барилгыг улсын төсвөөр цаашид үргэлжлүүлэх юм байна. Үүнээс 146 барилгыг нь энэ оны төсөвт оруулж ирэх боломжтой аж. Мөн зам гүүрийн 15 төслийг Хөгжлийн банкны хөрөнгө оруулалтаар шийдэх юм байна. Хөрөнгө оруулалтыг нь зайлшгүй өгч үргэлжлүүлэх шаардлагатай обьектууд дунд эмнэлэг, сургууль зэрэг нэн даруй барих шаардлагатай барилгууд байгаа аж.

Дээрх 270 гаруй барилгуудын төсөвт өртөг нь нэмэгдсэн шалтгаан нь хөрөнгө оруулалтыг төлөвлөх, ТЭЗҮ, зураг төсөл боловсруулах хянаж баталгаажуулах, техникийн нөхцөл хангах, гүйцэтгэгцийг сонгон шалгаруулах барилгын ажлыг зохион байгуулах санхүүжилтэнд хяналт тавих зэрэг хөрөнгө оруулалтыг эзэмших бүх үе шатанд нэгдсэн бодлого зохицуулалтгүй ажиллаж ирсэнд байгаа гэж Аудитын газраас мэдэгдлээ.

Өнөөдрийн хуралдааны үеэр гишүүдийн олонх нь барилга бүрийг ямар учир шалтгаанаар зогсоосон болон үргэлжлүүлэх болсон талаар дэлгэрэнгүй мэдээлэл авахыг Аудитын газраас шаардлаа. Харин үүнийг хийхэд бэлтгэл хэрэгтэй гэдгийг Аудитын газрынхан хэлэв. Мөн  төсөвт өртөгөө санаатайгаар нэмэгдүүлсэн барилгын хариуцагчдад ямар хариуцлага хүлээлгэх вэ? Хариуцлагыг тогтолцоог ямар түвшинд ярих вэ гэдгийг гишүүд мөн сонирхсон юм. Харин хариуцлагыг хууль, хяналтын байгууллагынхан тогтоох бөгөөд Аудитын байгууллага зөвхөн шалгалт хийж, дүгнэлтийг гаргах үүрэгтэй гэлээ.