Манайдаа л томоохонд тооцогдох барилгын компаниудаас багагүй зөрчил илэрснийг МХЕГ-аас мэдээлэв. Мэдээж овоо хөрөнгөлөг, нэр хүндтэй, эрхий бүхий байгууллагууд л 17 давхараас дээш барилга барих зөвшөөрлийг “атгаж” чадна. Тэгвэл эдгээр барилгуудаас ямар, ямар зөрчил илэрснийг баримттайгаар дэлгэж байна.

Томоохон барилгын компаниуд зөвшөөрөлгүй барилга барьж байжээ
Нийслэл хотод барьж буй 17 болон түүнээс дээш давхар бүхий шалгалтанд хамрагдсан нийт 20 цогцолбороос 11 цогцолборынх нь зураг төсөл болон угсралтын ажлыг тухайлсан обьектийн тусгай зөвшөөрөлгүйгээр хийсэн зөрчил илэрсэн байна. Тодруулбал, “Зуншин”, “Тедмент”, “Макс Өргөө” “MS Blue”, “Зуншан констракшн”, “MCS”, “Сөүлвин”, “Жигүүр гранд”, “ECC”, “Индустр”, “Зураг төслийн интелект паур”, “Каркасган”, “Марс констракшн” зэрэг 13 аж ахуй нэгжүүд тусгай зөвшөөрөлгүйгээр барилгын ажлыг гүйцэтгэж байсан байна.

Барилгын ажлыг эхлүүлэх хугацаа нь дууссан барилгууд
Шалгалтанд хамрагдсан нийт 20 цогцолборын 6 цогцолбор буюу “Хүннү хороолол”, “Болор мэлмий”, “B costal”, “Соёмбот өргөө цогцолбор”, иргэн С.Нямдаваагийн орон сууцны барилга, “Олон улсын санхүүгийн төвийн барилга”, “Шангрелла” зочид буудлын барилга, “H portuna” буюу “Хийморь роял” компанийн “Амартүвшин” хороолол зэрэг барилга обьектийн барилгын ажил эхлүүлэх зөвшөөрлийн хугацаа дууссан байна.
“Шангрелла” зочид буудал, “Соёмбот өргөө” цогцолбор баталгаажуулаагүй зураг төслөөр барилгаа эхлүүлжээ

Шалгалтанд хамрагдсан нийт 20 цогцолбороос 8 цогцолбор нь буюу “Хурд грүпп” компанийн оффис, “Болор мэлмий” цогцолбор, “Соёмбот өргөө” цогцолбор, Олон улсын санхүүгийн төвийн барилга, “Шангрелла” зочид буудлын барилгууд нь магадлал хийлгэж, баталгаажуулаагүй зураг төслөөр барилгын ажил гүйцэтгэж байгаа зөрчил нь барилгын тухай хуулийн 13.2, 13.2, 16.2 дахь заалтуудыг зөрчжээ.

Энэ зөрчлийн гол шалтгаан нь гадаад улсад боловсруулсан зураг төслийн орчуулга хийгдээгүй, Монгол Улсын зураг төслийн компани зураг төслийг баталгаажуулаагүй, манай улсад мөрдөхийг батлаагүй тооцооны программаар үндсэн бүтээгдэхүүний тооцоог хийсэн байна. Мөн зураг төсөл магадлал хийгдэхгүй удааширч байгаагаас ихэнх барилгуудын гаднах сүлжээний иж бүрдэл, зураг төсүүд улсын албаар хянагдахгүй, хангагч байгууллагууд баталгаажуулсанаар угсралтын ажлыг гүйцэтгэж байгаа нь хуулийн олон заалтуудыг зөрчиж байгаа аж.

Нийслэл хотын газар хөдлөлтийн өндөр идэвхтэй бүс нутагт барьж буй барилгын угсралтын ажлын явцад газар хөдлөлтийн бүс нутагт, барилга төлөвлөх барилгын норм дүрэм болон өндөр барилгын төлөвлөлт нормын холбогдох заалтуудыг зөрчиж байгаа зөрчлүүд илэрчээ. Тодруулбал, “Индустр” компанийн “Соёмбот өргөө” цогцолбор нь батлагдсан зураг төлийг зөрчиж 22 давхар барилгыг зөвшөөрөлгүйгээр 30 давхар болгосон байна. Мөн “Хүннү” хорооллын барилга газар хөдлөлтийн 8 баллын бүсэд байрлаж байхад 7 балл-д тооцон зураг төслийг боловсруулжээ. Барилга угсралтын  явцын өөрчлөлтийн ажлуудад гүйцэтгэлийн зураг төсөл боловсруулж баталгаажуулаагүй нь барилгын тухай хуулийн холбогдох заалтыг зөрчжээ. Тухайлбал, Баянзүрх дүүргийн 25-р хорооны нутаг дэвсгэрт баригдаж буй “Хийморь роял” компанийн гүйцэтгэж байгаа “Амартүвшин” хотхоны орон сууцны барилгын батлагдсан зураг төслийг өөрчилж нэгдүгээр давхарыг үйлчилгээний зориулалтаар төлөвлөсөн байсныг сууцны зориулалттай болгож өөрчилжээ. Мөн бусад зураг төслийг ч өөрчилсөн зөрчил гаргажээ. Түүнчлэн “Зуншин” компанийн барьж буюу “Макс Өргөө” компанийн зочид буудал, үйлчилгээний газар,  “Хийморь роял” компанийн барьж буй “Амартүвшин” хороолол барилга байгууламжийн даацын үндсэн хийц, бүтээгцийн ажиллах зарчмыг алдагдуулж, бат бэх байдлыг нь бууруулжээ.

“Жигүүр гранд”, “Макс өргөө” компаниас ч зөрчлүүд илэрчээ
Шалгалтанд хамрагдсан нийт 20 цогцолбороос 5 цогцолбор буюу “Хурд грүпп”-ийн 25 давхар оффис, “Хүннү” хороолол, “Жигүүр гранд” хорооллын бариулж буй цогцолбор, “Рийч портуна” буюу “Хийморь роял”-ын гүйцэтгэж байгаа “Амартүвшин” хотхон, “Макс өргөө” компанийн “Болор мэлмий” цогцолбор барилгуудын талбайн журналийн хөтлөлт хангалтгүй, ажлын акт бичигдээгүй. Бичилтийн шаардлага хангахгүй, холбогдох мэргэжилтнүүдээр баталгаажуулаагүй, зохиогчийн хяналт хангалтгүй, тогтмолжоогүй, зохиогч болон зураг төслийн хяналт хийгддэг боловч талбайн журнал дээр бичдэггүй  байжээ.

Чанаргүй, зураг төсөлд тусгагдаагүй барилгын материал хэрэглэсэн компаниуд ч байна
Эдгээр газруудаас 3 цогцолбор нь үндсэн хийц бүтээц болох зутгамал төмөр бетон, арам, хучилтын бетон зуурмагаас дээж авч, сорьц шахуулдаггүй, үндсэн бетоны бат бөхийг эрх бүхий итгэмжлэгдсэн лобариториор тодорхойлуулдаггүй, бетон зуурмагийн бат бэх төсөлд заагдсан чанарыг хангахгүй байх нийтлэг зөрчлийг гаргажээ. Тухайлбал, “Хийморь роял” компанийн барьж байгаа “Амар Түвшин” орон сууцны хорооллын барилгад хэрэглэсэн бетон зуурмагын гарал үүслийн гэрчилгээ, тохирлын гэрчилгээ зэрэг байхгүй, 13-ийн диаметртэй арматур хэрэглэсэн “Тедмент” компанийн орон сууцны барилгад зураг төслийн өөрчилж өөр  төрлийн арматурыг хэрэглэсэн, шаардлага хангаагүй барилгын материал ашигласан байжээ. Мөн “Зуншин” компанийн гүйцэтгэж байгаа “Макс өргөө” компанийн барилгын зураг төсөлд B25 маркийн бетон хэрэглэхээр заасан ч ММ25 маркийн бетон хэрэглэсэн байна. Эдгээр зөрчлүүд дээрх нэр дурдагдсан компаниудад ч давтагджээ.

“Тедмент” компанийн барьж буй “Нарлаг” хорооллын барилгыг МХЕГ-аас шалгаад Ус сувгийн удирдах газраас олгосон техникийн нөхцлийн дагуу  цэвэр усны хангамжинд төвлөрсөн шугам сүлжээнээс холбохоор заасан байхад газар дээр нь өөрчилж гүний худгаас холбон оршин суугчдын эрх ашгийг хөндсөн зөрчил илэрчээ. Ийм байхад Нийслэлийн ерөнхий төлөвлөгөөний газраас зохион байгуулсан улсын комиссоор тухайн барилгыг хүлээж авсан байна.