Ерөнхий сайд Н.Алтанхуяг эдийн засгийн нөхцөл байдлын талаар УИХ дахь намын бүлгүүдэд мэдээлэл өгөхөөс удаа дараа "бултаж" байгаа гэнэ.

 Угаас тэрбээр эдийн засгийн талаар мэдээлэл хийх ямар ч хүсэлгүй байгаа бөгөөд зөвхөн Үндэсний аюулгүй байдлын зөвлөлийн шахалтаар л намын бүлгүүдэд мэдээлэл өгөхөөс өөр аргагүй болсон байна.

Тодруулбал, Үндэсний аюулгүй байдлын зөвлөл хуралдаж Монголын эдийн засгийн өнөөдрийн нөхцөл байдлын талаар ярилцаад үнэхээр эдийн засагт “улаан гэрэл” ассан гэдгийг хүлээн зөвшөөрчээ. Тиймээс Засгийн газрын зүгээс яаралтай арга хэмжээ авахыг Ерөнхий сайд Н.Алтанхуягт даалгасан байна. Ингэхийн тулд намын бүлгүүдэд мэдээлэл хийж, тэдэнтэй хамтран эдийн засгийн хүндрэлээс гарах арга замыг эрэлхийлэхийг анхааруулжээ.

Ингээд л Ерөнхий сайд хүссэн ч, эс хүссэн ч УИХ дахь намын бүлгүүдэд мэдээлэл хийх шаардлагатай болсон байна. Харин эрхэм сайд маань хэзээ, хэрхэн мэдээлэл хийх нь одоогоор тодорхойгүй байна. Харин намын бүлгүүд яаралтай мэдээлэл сонсож, даруй арга хэмжээ авахыг шаардаж байгаа аж.

Эх сурвалжийн мэдээлж буйгаар Засгийн газрын зүгээс Говийн их дархан цаазат газар болох “Талын мэлтэс”-ийг ухаж, эдийн засгийн эргэлтэнд оруулж байж л шал дордсон эдийн засгаа өндийлгөнө хэмээн ярихаар бэлтгэж байгаа гэнэ.

Тэгэхээр Говийн их дархан цаазат газраа ашиглахаас өөрөөр эдийн засгийн хүндрэлээс гарах арга энэ Засгийн газарт үлдээгүй бололтой. Ерөнхий сайд Н.Алтанхуяг эдийн засгийн нөхцөл байдлын талаар “Дэлхийн эдийн засгийн байдал, урд хөршийн эдийн засаг өнгөрсөн онд сайнгүй байсан. Ийм үед бид Монгол банктай хамтарч хөтөлбөр хэрэгжүүлснээр дотоод дахь ажлуудаа хөдөлгөж эдийн засгийн өсөлтийг 11.7 хувьтай гаргаж чадсан.  Өнөө жил ч эдийн засаг мөн л адилхан сайнгүй байна. Ийм байгаа ч бид дотооддоо авах ёстой арга хэмжээг авч байгаа” гэсэн товчхон хариултыг өгч байгаа юм.

Засгийн газрын зүгээс эдийн засгийн өсөлтийг 11.4 хувьтай гаргаж чадсан гэж байгаа  ч бодит байдал дээр иргэдийн худалдан авах чадвар өдрөөс өдөрт буурсаар л байгаа. Үүнийг хүнс хэрэглэж, хувцас өмсдөг бүх хүмүүс мэднэ. Барааны үнэ өсөхийн хэрээр иргэдийн нуруун дээрх ачаа нэмэгдэж, улам л амьдрал нь туйлдаж байгаа.

Мөн Засгийн газрын гадаад өрийн хэмжээ 91,8 хувиар буюу 2,3 тэрбум ам.доллараар нэмэгдсэн, гадаадын хөрөнгө оруулалтын хэмжээ 50 гаруй хувиар буурсан, эдийн засгийн өсөлт саарсан зэрэг олон сөрөг үзүүлэлтүүд бий болжээ.

Зөвхөн төгрөгийн ханшийн сулралаас болж Монгол Улсын Засгийн газар 1,5 тэрбум ам.долларын "Чингис" бондын 70 орчим хувьтай тэнцэх хэмжээний алдагдал хүлээхийн зэрэгцээ иргэн, хуулийн этгээд бүр олсон 100 төгрөг тутмаасаа 30 төгрөгийн алдагдал хүлээж байгаа гэж эдийн засагчид хэлж байна. Үүний улмаас олон зуун бизнес эрхлэгчид үйл ажиллагаагаа зогсооход хүрээд байгаа аж. Мөн олон байгууллага дотооддоо цомхотгол хийж байна.

Энэ мэт нөхцөл байдал болон бодит амьдрал эдийн засгийг уналтад орсон гэдгийг харуулж байхад Засгийн газрын зүгээс намын бүлгүүдтэйгээ хамтран яаралтай арга хэмжээ авч ажиллах ёстой хэмээн зарим эдийн засагчид зөвлөж байна.