УИХ-ын төсвийн байнгын хороогоор үндэсний аудитын газраас шалгалт хийсэн 272 төсөл хөтөлбөрийг хэлэлцсэн. Авилгажсан гэж тодорхойлогдоод байгаа эдгээр төслүүдийн 146-г нь энэ ондоо үргэлжлүүлэх боломжтой гэж үзсэн бол үлдсэн төслүүдтэй холбоотой ихээхэн маргаан гарсан юм. Зарим гишүүд ямар компани, хэчнээн төгрөг авсныг зарлах ёстой гэж байлаа. Харин УИХ-ын гишүүн С.Бямбацогт "Асуудлыг зөв ярьж байна. Гэхдээ буруутан гээд хувийн хэвшилрүүгээ дайрах нь. Би хувийн хэвшлийг буруутай гэж үзэхгүй. Буруутай эзэд нь УИХ, Засгийн газар. Бид бодлогоо зөв тодорхойлдоггүй, гаргасан бодлогоо хэрэгжүүлдэггүй, хэрэгжилтэнд нь хяналт тавьдаггүйгээс алдаа дутагдал гарсан" гэж хувийн хэвшлийнхэнийг өмгөөлж эрх баригчдад хариуцлага сануулсан цорын ганц байр суурийг илэрхийлсэн юм.  Харин УИХ-ын дарга З.Энхболд "УИХ өөрөө буруутай гэдэгтэй би санал нийлэхгүй. Эдийн засаг өсөлттэй байхад УИХ, Засгийн газар хүссэн мөнгийг нь өгдөг байсан. Энэ хэсэгт л УИХ буруутай. Харин шинэ УИХ анх удаа практикаасаа татгалзаж байна. Зураг төсөлгүй бол мөнгө байхгүй" гэж эрх мэдэлтнүүдээ өмгөөлсөн. Өөрөө хэлбэр өмнөх УИХ л зураг төсөлгүй төсөв баталсан энэ УИХ тийм алдаа гаргаагүй, буруутан биш гэж үзэж байгаа аж. Тэгвэл Ерөнхий сайдын багцад суусан задаргаагүй 50 тэрбум төгрөг, Чингис бондын 1.5 тэрбум долларыг төсвөөс гадуур зарцуулж байгаа бүх төсөл хөтөлбөрүүдийн зураг төсөв, үндэслэл тооцоог УИХ хянасан уу? гэдэг зарчмын асуудал зайлшгүй үүсч байгаа юм.