Хуурамч мөнгөн дэвсгэртийн асуудалд ЦЕГ-ын даргын тушаалаар Нийслэлийн цагдаагийн газар, Мөрдөн байцаах газар, Эрүүгийн цагдаагийн газар, "Монгол банк"-ны холбогдох албаны улсуудтай нийлээд ажлын хэсэг байгуулаад ажиллаж байна. Ажиллагааны хүрээнд хуурамч мөнгө хийж байгаа, үйлдэл гаргасан этгээдүүдийг барьж илрүүлсээр байгаа юм.

Улмаар тухайн мөнгөнүүдийг хаана байгааг хяналтанд авч цуглуулж байгаа ч энэ хэрэг өдөр алгасахгүй гарч байгааг цагдаагийн байгууллагаас онцолж байна. Тиймээс энэ удаад сэрэмжлүүлэг болох үүднээс хуурамч, жинхэнэ мөнгийг хэрхэн ялгах талаарх зарим мэдээллийг хүргэхээр бэлтгэлээ.

    Юутай ч хуурамч мөнгийг мэдсээр байж нуун дарагдуулсан, зарж үрэгдүүлсэн тохиолдолд ямар хариуцлага хүлээх талаар ЦЕГ-ын хэвлэл мэдээллийн төвийн ахлах байцаагч, Цагдаагийн ахмад Ё.Лхагвасүрэнгээс тодруулахад "Хуурамч мөнгөн тэмдэгтийг иргэд заавал цагдааийн байгууллагад мэдэгдэх үүрэгтэй. Хэрэв мэдэгдэхгүй нуун дарагдуулах, мэдсээр байж тухайн мөнгийг гүйлгээнд оруулсан бол эрүүгийн хэрэг үүсгэх журмыг  баталсан. Тэгэхээр иргэд хуурамч мөнгөн тэмдэгт авсан тохиолдолд заавал цагдаагийн байгууллагад мэдэгдэх үүрэгтэй. Хэрэв та биелүүлэхгүй бол эрүүгийн хариуцлага хүлээх юм" гэв.

Тэгэхээр иргэд чухам ямар учраас хуурамч мөнгө ашигласан хэмээн хэрэгт татагдаад байгаа нь мэдээлэл муу байгаагаас улбаатай юм. Учир нь ихэнх иргэд хуурамч, жинхэнэ мөнгөн тэмдэгтийг ялгааг төдийлөн мэддэггүй нь энэ хэрэгт татагдах гол шалтгаан болж байдаг аж.

1. Хуурамч мөнгөн дэвсгэрт ус үзэж чаддаггүй. Өөрөөр хэлбэл усанд хийх, норгох тохиолдолд шууд уусч алга болдог.

2.Мөнгөн тэмдэгтийн цаас шажигнаж, хуруугаар илэхэд гөлгөр байвал та мэргэжлийн хүмүүсээр шалгуулах хэрэгтэй.

3.Мөнгөн дэвсгэртийн цаас хатуу, нугалахад шажигнаж дуугарна.  Хоёр талаас нь хурууны үзүүрээр хавчин гүйлгэж татахад  дэвсгэртийн хоёр талд байрлах Чингис хааны гэрэгэгийн дээд хэсгийн дугуй дүрсүүд зөрүүгүй давхцана. 20000 төгрөгийг тусгай гэрлээр харахад Чингис хааны хөрөг гэрэлтэн тодорч харагддаг байна. Ийм байвал жинхэнэ мөнгө гэсэн үг.

Харин одоо хуурамч 20000, 10000 мянгатыг хэрхэн ялгах талаарх мэдээллийг хүргье.

20 мянгат:  Холограмм дардас дотор Соёмбо, 20000-тын тоо солонгорч үзэгдэнэ. Дэвсгэртийн дэвсгэр зураг, ялангуай 20000 гэсэн нэрлэсэн үнэ нь гарт мэдэгдэхээр товгор хийгдсэн байдаг.

Дэвсгэр зургийн зүүн доод талын босоо хэвтээ ирмэгийн дагуу "MONGOLBANK" гэсэн үгийг маш жижгээр бичсэн байдаг. Гэрлийн эсрэг барьж харахад Чингис Хааны хөрөг болон "МБ" үсгүүд усан хээгээр тодорч харагдана. Налуугаас харахад дөрвөн морьтон баатрын дүрс, дэвсгэр өнгө нь дөрвөн хэсэгт тодорч үзэгдэнэ. Гурван мм-ийн өргөнтэй тасалдаж харагдах металл утсан дээр "MONGOLBANK" гэсэн үг болон Соёмбо солигдож харагдана.

10 мянгат: 10000 төгрөгний Чингис хааны хөргийг усан хээгээр бүтээсэн байдаг. Хэт ягаан туяанд гэрэлтэнэ.Үндсэн хээ, тоо үсгүүдийг гарт тэмтрэгдэхээр товгор хэвлэсэн. Тэгэхээр дээрх нууцлалын аль нэг нь байхгүй болон хэт хатуу цаастай байвал хуурамч мөнгөн дэвсгэрт гэсэн үг юм. Хуурамч мөнгөн тэмдэгтийг сайн ажиглавал болхи хийцтэйг нь мэдэж болдог хэмээн мэргэжилтнүүд хэлдэг.

Хэрэв хуурамч байж болзошгүй мөнгөн тэмдэгтийг санаандгүй хүлээн авбал, дэвсгэртийг дамжуулсан хүнд буцааж өгөлгүйгээр хамгийн ойр байрлах цагдаагийн хэсэгт аваачиж өгөхийг Монголбанк, ЭЦГ зөвлөж байна.