Засгийн газар орон сууцжуулах хөтөлбөрийн хүрээнд Буянт-Ухаа хотхоны 1764 айлын орон сууцыг бариулсан. Богино хугацаанд үндэсний томоохон компаниуд хамтарч барьсан, чанарын хувьд гологдохооргүй гээд тус хорооллын давуу тал их. Орон сууцны үнэ дээд цэгтээ хүртэл хөөсөрч иргэдийн бухимдал газар авч  байхад Ерөнхий сайд “Буянт - Ухаа хороолол ашиглалтанд орвол үүнийг зохицуулна, тус хороолол хамгийн хямд байна, битгий санаа зов”гэж тэднийг тайтгаруулж, багагүй хүлээлт үүсгээд байсан.

Гэтэл тус хороолол ашиглалтанд ороход зорилтод бүлгийнхэнд зориулж бариулсан, орон сууцны зах зээлийн үнийг буулгахад огт нөлөөлөхгүй гэдэг нь тодорхой болсон. Тодруулбал Буянт - Ухаа хотхоны 60 хувийг төрийн албан хаагчдад үлдэж байгаа 40 хувийг ахмад настан болон зорилтод бүлгийнхэнд олгохоор журамласан билээ. Ийнхүү хямд орон сууцанд орно гэсэн хүлээлтэй байсан иргэдийн хүлээлт талаар болж, төр засаг ард иргэдээ ялгаварлах болсонд цөөнгүй хүн дургүйцлээ илэрхийлж байсан.

Гэвч зорилтод бүлгийнхэнд гэсэн тодотголтой тус хороолол анхнаасаа ардчилсан намын гишүүдийг орон сууцжуулах бодлого байсан гэдгийг зарим хэвлэл онцлох болсон. Төрийн албан хаагчид гэсэн нэрийн дор 2012 оны сонгуульд ажилласан, ардчилсан намынханыг дэмждэг, дарга сайд нарын танил хүмүүст тус хотхоны байрийг олгож байна гэсэн мэдээлэл газар авах болов.

АН Засгийн эрхийг авснаар төрийн албанд хууль дүрмийг үл тоомсорлон МАН-ын үед ажиллаж байсан олон мянган албан хаагчдыг хомроглон халсан. Өнөөдөр шүүх, цагдаа, сургууль, цэцэрлэг, эмнэлэг гээд бүхий л төрийн байгууллагын удирдлага тэдний гарт орсон бөгөөд дунд шатны дарга нар нь өөрсдийн ах дүү, хамаатан саднаараа төрийн албыг төрлийн алба болгоод дүүргэчихсэн гэх гомдол тасрахгүй байгаа. Төрийн албан хаагч нэрийн дор голдуу ардчилсан намын гишүүд, дэмжигчид, ах дүү, хамаатан садан хүмүүс буянт ухаа хорооллоос байртай болж засаг солигдоход ажил албандаа арай хийн тогтож үлдсэн хүмүүст энэ байрны бараа ч харагдахгүй байгаа талаар их гомдоллох болсон байна.

Тэр ч бүү АН-ынхан ардчилсан хувьсгалд оролцож явсан бүх партизануудаа орон сууцтай болгоно гэсэн тохироог дотооддоо хийсэн гэдэг. Сонгинохайрхан дүүрэгт Алтан тариа үйлдвэрийн урд шинээр баригдсан орон сууц МОАХ-ны байр гэдгээрээ тэр хавьдаа нэрд гараад байгаа. Ямар журмаар, хаанаас санхүүжүүлсэн нь тодорхойгүй боловч тус байранд ардчилсан хувьсгалд оролцож явсан партизанууд нүүж ирсэн гэдгийг баттай эх сурвалж хэлж байгаа юм. Тэгвэл буянт ухаа хорооллын үлдэж байгаа 40 хувьд нь ахмад настан зорилтод бүлгийнхэнийг оруулна гэсэн нэрийн дор мөн л ардчилсан хувьсгалд оролцож явсан ахмадууд, ардчилсан намыг дагаж яваад сүүдтэй юманд хүрээгүй хүмүүсийг оруулж байна гэх шүүмжлэл мөн газар авах болсон нь оргүй яриа биш юм. Зарим эх сурвалжийн мэдээллэж буйгаар ардчилсан хувьсгалд оролцож явсан партизануудруугаа АН-ынхан утасдаж “таныг байртай болгоно, буянт ухаа хороололд оруулна” гэж ярих болсон байна. Ийнхүү ард иргэдээ хямд орон сууцаар хангах хөтөлбөрийг улс төржүүлж, намаар ялгаварлах болсонд бухимдах иргэд олон байна.