Санхүүгийн өршөөлийн хууль гаргах тухай яриа дэгдсэнээс хойш янз бүрийн үзэл бодлууд нийгэмд бий болоод байна. Тухайлбал, зарим хүмүүс энэ хуулийн төслийг Н.Батбаяр сайд С.Баярцогт нарын зарим нэр, нөлөө бүхий хүмүүст  зориулж санаачлахаар зорьж байна гэж үзэж байгаа. Харин нөгөө хэсэг нь энэ хууль хэрэгжвэл бизнес эрхлэгчдэд ч , улс оронд ч зөв зүйтэй зүйл болно хэмээж байгаа юм.

Харин “Урбанек”-ийн гэдэг тодотголтой ч, МАН-ын Бага хурлын гишүүн, УИХ дахь МАН-ын бүлгийн ажлын албаны зөвлөх хийж явсан Б.Лхагважав сөрөг хүчнийхэндээ хатуухан хэрнээ “үнэтэй” зөвлөгөөг шулуухан хэлж орхив.

Түүнийхээр бол манай үе үеийн Ерөнхий сайдууд, тэр дундаа Н.Алтанхуяг сайд эдийн засгийн ямар ч мэдлэггүй байгаагаас өнөөдрийн энэ нөхцөл байдалд хүрсэн.Харин одоогийн ерөнхий сайдыг түр ч болов солиод Р.Амаржаргал гишүүнийг томилвол эдийн засаг шал өөрөөр эргэнэ гэсэн юм. Ер нь  эдийн засаг өсч, бизнес эрхэлж байгаа хүмүүс урам зоригтой болсон эрчтэй үе ирэхэд  эдийн засагч биш Ерөнхий сайдууд гарч ирээд олсон ашгаа популизм руу явуулчихсан нь маш буруу гэдэг үгийг ч тэрбээр дайв.

Юутай ч түүний хэлсэн үгийг бүрэн эхээр нь хүргэхэд,  “Манай улсын нийт эдийн засгийн удирдаач нь Ерөнхий сайд. Энэ удирдаач маань нотоо мэдэхгүй байгаа юм биш биз гэсэн сэжиг төрөөд байна. Сүүлийн үед хийж байгаа гэнэн алдаануудыг харахад “Энэ хүнд макро эдийн засгийн төвшний ойлголт маруухан юм байна шүү” гэдэг дүгнэлт  хийхэд хүрч байгаа юм.  Өмнө нь 1990-1993 оны хүнд хэцүү үеийг хуучин нийгмийн тогтолцооны хамгийн мундаг эдийн засагч Д.Бямбасүрэн, П.Жасрай нар авч гарч байсан. Тэд төвлөрсөн төлөвлөгөөт эдийн засгаас гадна нөгөө капиталист талынх нь онолыг бас мэднэ шүү дээ. Эдийн засгийг хэзээ өвчилж, ханиад хүрэх вэ, хэзээ баярлаж хөөрөх вэ гэдгийг мэдэж байсан. Тиймээс төвлөрсөн төлөвлөгөөт эдийн засгийг зах зээлийн эдийн засагт шилжүүлэх үйл ажиллагааг энэ хоёр эдийн засагч  их сайн авч гарсан байгаа юм.  Ингээд 1996 онд М.Энхсайхан үнэ чөлөөлсөн. Мөн л эдийн засаг их хямралтай байсан үе шүү дээ. Дараа нь 2009 онд С.Батболд хасах үзүүлэлттэй эдийн засаг хүлээж авсан. Оношийг нь зөв тавьж чадсан байдаг юм. Бусад үед их сонин. Манай улсад эдийн засагч Ерөнхий сайд байгаагүй.  Харин Р.Амаржаргал гишүүн улс төрийн нөхцөл байдлаас шалтгаалан завсрын үед жил хүрэхтэй, үгүйтэй хугацаанд Ерөнхий сайдаар ажилласан учир түүнийг би тооцоогүй.  Энэ үед эдийн засгийнхаа ур чадварыг гаргаж чадаагүй. Ийм боломж ч байгаагүй.  Харин дараа нь эдийн засаг өсч, бизнес эрхэлж байгаа хүмүүс урам зоригтой болсон эрчтэй үе ирсэн.  Гэтэл энэ үед манай эдийн засагч биш Ерөнхий сайдууд гарч ирээд олсон ашгаа популизм руу явуулчихсан юм.  Тиймээс хэрэв болдог бол АН-ынхан Р.Амаржаргал гишүүнийг Ерөнхий сайд болгоод үзээсэй гэж  боддог.  Р.Амаржаргал гишүүнийг Ерөнхий сайд болговол одоо байгаа макро төвшний асуудлыг шийдэхэд их үүрэгтэй оролцож чадна.  Яагаад гэвэл, тэр хүн эдийн засгийнхаа өвчинг зөв оношилно. Бусад хүмүүс яаж ч хичээгээд оношоо гадарлахгүй. Өөрөөр хэлбэл, эдийн засгийг удирдаж чаддаг хүндээ түр өгөх хэрэгтэй” гэсэн юм.

Ийн хэлэе гэснээ шуудхан хэлж орхидог Б.Лхагважав өмнө нь намынхныгаа популизм хийгээд байна гэж “хатуухан” шүүмжилж байсан. Харин энэ удаад Ерөнхий сайд Н.Алтанхуягийг "удирдаач байж нотоо мэдэхгүй" хэмээн чихийг нь халууцуулав.