Малайзын 239 зорчигчтой онгоц алга болсоны дараа дэлхий нийт тэр чигээрээ зорчигчдын хувь заяанд санаа зовниж байгаа билээ. Тиймээс түүхэнд тэмдэглэгдэн үлдсэн хамгийн ноцтой онгоцны ослуудын талаарх мэдээллийг хүргэж байна. Эдгээр онгоцуудын зарим нь эргэж олдохгүй он удаан жилийг өнгөрүүлсэн нь харамсалтай.
1.    1937 онд дэлхийг тойрохоор нисч явсан онгоц Номхон далай дээгүүр нисч яваад ор сураггүй алга болжээ. Эмэгтэй нисэгч Эмелия Эрхарт ахмад Фред Нунаны хамтаар аялж явсан хос хөдөлгүүрт онгоцыг олж чадаагүй юм. Хатагтай Эмелияг хоёр жилийн дараа нас барсан гэж зарласан ч хүмүүс онгоцны эрлийг зогсоогоогүй байна.
2.    2009 онд 447 дугаартай нислэг үйлдсэн Францын зорчигч тээврийн онгоц Рио Де Жанеро хотоос Парисыг чиглэн нисч яваад осолджээ. Онгоцны хэлтэрхийг олох гэж тав хоног зарцуулсан бол хар хайрцгийг нь хоёр жилийн дараа далайн гүнээс илрүүлсэн юм. 228 хүнтэй Францын онгоцны  мотор тасарч автомат залуур нь холбоогүй болсон гэж шинжээчид үзжээ.
3.    1999 оны аравдугаар сард Лос Анжелес хотоос Египетийн Каир хот руу нисч явсан онгоц Атландын далайд унаж, дотор нь сууж явсан 217 хүн бүгд нас барсан юм. Египетчүүд энэхүү онгоцыг механик гэмтлээс болж сүйрсэн гэж дүгнэжээ. Боинг 767-300 онгоц сүйрсэнээс хойш хоёр долоо хоногийн дараа Америк, Египетчүүд санаатай аллага байж магадгүй хэмээн шалгалт явуулсан ч эцэстээ онгоцны хяналтын систем эвдэрсэнээс болсон гэдэгтэй санал нэгдсэн байна. Эрэл хайгуулд нисдэг тэрэг, онгоцуудыг ашигласны эцэст олж чаджээ. Гэхдээ 2000 оны гуравдугаар сард хоёр дахь хөдөлгүүр, бүхээгний хяналтын системийг эрэн хайх ажиллагаа явуулжээ.

4.    1947 онд “Star Dust” гэдэг Их Британийн онгоц Буэнос Айрес хотоос Чилийн Сантего руу нисч яваад Аргентины Андын нуруунд осолджээ. Онгоцыг эрэн хайх ажиллагаа замхарсаар 50 жилийн дараа Андын нуруунд авирч явсан уулчид ул мөрийг нь илрүүлсэн байна. Ингээд 2000 онд онгоцыг цаг агаарын таагүй байдлаас болж сүйрсэн гэдэг дүгнэлт гаргасан ажээ.

5.    Бермудын гурвалжин гэж нэрлэгддэг газар хэд хэдэн усан онгоц, агаарын хөлгүүд осолдож, ямар ч ул мөргүй алга болжээ. Энд 1940-өөд онд Их Британийн хоёр болон Өмнөд Америк тивийн хэд хэдэн онгоц осолдсон юм. Ослын шалтгаан нь техникийн саатал гэж шинжээчид дүгнэсэн байхад Бермудын гурвалжингийн аймшигтай холбон тайлбарладаг хүмүүс цөөнгүй.

6.    Уругвай улсаас 571-р нислэгээр замдаа гарч, Чилийн Сантиего хотыг зорьж явсан онгоц мөн Андын нуруунд осолджээ. Онгоцны толгой хэсэг ууланд хавчуулагдаж, хоёр далавч нь тасарсан гэдэг. Онгоцонд зорчиж явсан 45 хүний тэн хагас амьд үлдэж, ууландаа харилцаа холбооноос таслагдан 72 хоног амьдарч байсан хачирхалтай түүх бий. Эцэст нь аврагчдыг ирэхэд 16 хүн амьд үлдсэн байжээ. Тэдгээр хүмүүс амьд гарахын тулд хүний мах идэж байсан тухай домог мэт яриа байдаг. Энэ хүмүүсийн түүхээс сэдэвлэн 1993 онд кино уран бүтээл хийжээ.

7.    1996 оны долдугаар сард Нью-Йорк хотоос хөөрсөн 230 зорчигчтой онгоц хэдхэн минутын дараа дэлбэрсэн байна. Онгоцны нэг талын далавчин дахь түлшний сав дэлбэрсэн гэж шинжээчид дүгнэсэн хэдий ч ослыг нүдээр харсан гэрчүүд янз бүрийн таамаглал дэвшүүлжээ.

8.    Америкийн адал явдал хайгч Стив Фоссет 2007 онд хувийн онгоцоороо нисээд хэзээ ч эргэж ирээгүй билээ. 63 настай Стив дэлхийг тойрон аялахаар зорьсон ч сүйрсэн онгоцыг нэг жилийн дараа сайн дурын ажилтнууд Google Earth программын тусламжтайгаар олжээ.

9.    Италийн “Missoni” хэмээх загварын агентлагийн захирлыг тээвэрлэж явсан жижиг оврын онгоц 2013 оны нэгдүгээр сард Венесуэл улсын эргээс алга болжээ. Зургаан хүнтэй энэ онгоцыг сүйрсэнээс хойш 6 сарын дараа олсон гэдэг. Энэ онгоцны сүйрлийг Бермудын гурвалжингийн учир битүүлэг явдалтай холбон тайлбарладаг байна.