Төрийн албан хаагч, хэв журам сахиулсан олон нийтийн байцаагчийг биед халдсан хэрэг уржигдар гарчээ. Тодруулбал, БЗД-ийн зургадугаар хорооны нутаг дэвсгэр, "Оюутны хотхон"-ы байрны хажууд зөрчил гаргасан "аксент" маркын автомашиныг шалгахад  уг автомашинд архи ууж байсан Чингэлтэй дүүргийн 18-р хороонд оршин суух 52 настай эрэгтэй Ц гэгч согтуурсан үедээ цагдаагийн хууль ёсны шаардлагыг эсэргүүцсэн байна. Улмаар цагдаагийн албан хаагчийн нүүрэнд нь гэмтэл учруулж, дүрэмт хувцсыг нь урж, холбоо барьдаг станцыг нь эвдэлсэн хэрэг гарчээ. Энэ хэргийг БЗД-ийн цагдаагийн хоёрдугаар хэлтэст шалгаж байгаа юм байна.

Ийм тохиолдолд тухайн иргэнд ямар хариуцлага тооцдогийг ЦЕГ-ын хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэнгээс тодруулахад " Хэв журам хариуцсан олон нийтийн байцаагчийг эсэргүүцсэн тохиолдолд хөдөлмөрийн хөлсний доод хэмжээг 51- 250 дахин нэмэгдүүлсэнтэй тэнцэх хэмжээний мөнгөөр торгох, 500 хүртэлх цагаар албадан хөдөлмөр хийлгэх, эсвэл хэргийнх нь  нөхцөл байдлаас хамаараад тав хүртэлх жилийн хорих ялаар шийтгэдэг. Дээрээс нь Бусдын биед гэмтэл учруулах  гэдэг зүйл ангиар шийтгэл нь нэмэгддэг" гэв.