Гаалийн байгууллага эрсдлийн судалгаанд үндэслэсэн хяналт шалгалтыг зохион байгуулснаар Гаалийн ерөнхий газрын харьяа Буянт-Ухаа дахь гаалийн газрын гаалийн хяналтын бүсээр энэ сарын 11-ны өдөр "ОМ-223" нислэгээр зорчих гэж байсан БНХАУ-ын иргэний ачаа тээшнээс түүх соёлын хосгүй үнэт зүйл болох бурхан, үйсэн дээрх бичээс, судар зэрэг нийт 81 ширхэг эд зүйлийг улсын хилээр хууль бусаар нэвтрүүлэх гэж байсныг Гаалийн улсын байцаагч нар  илрүүлж, гэмт хэргийн шинжтэй үйлдлийг таслан зогсоосон байна. Уг хэргийг Цагдаагийн байгууллага болон Соёлын өвийн төвд шалгуулахаар шилжүүлээд байна. Тэгвэл Монгол Улсын хилээр хууль бусаар эд зүйл гаргах тохиолдол он гарсанаас хойш цагдаагийн байгууллагад хэд бүртгэгдсэн талаар ЦЕГ-ын хэвлэл мэдээллийн хэлтсийн ахлах байцаагч, цагдаагийн ахмад Ё.Лхагвасүрэнгээс тодруулахад "Монгол Улсын хилээр хууль бус эд зүйл гаргаж байсан зөрчлүүдийг цагдаагийн байгууллага цөөнгүй илрүүлсэн. Одоогийн байдлаар 10-иад гэмт хэргийг илрүүлэн шалгалтын ажиллагаа явуулж байна. Ихэвчлэн БНХАУ руу хууль бусаар хориглосон бараа оруулахыг оролдсон зүйл байгаа. Саяхан Иргэний агаарын тээвэр буюу МИАТ дахь гаалийн хэсгээр түүхийн үнэт олдворгыг гаргаж байсан зөрчлийг Гаалын байгууллага илрүүлж, цагдаагийн байгууллагатай хамтран шалгалтын ажиллагааг явуулж байна" гэв.