Сэлэнгэ аймгийн Ерөө сумын Баянгол гэх уулын орчимд хууль бусаар их хэмжээний нойтон мод бэлтгэсэн байна гэсэн мэдээллийн  дагуу Зохион байгуулалттай гэмт хэрэгтэй тэмцэх газрын Байгаль хамгаалах журмын эсрэг хэлтсийн ажилчид хамтарсан шалгалт явуулсан байна. Шалгалтыг энэ сарын 13-15-ны хооронд явуулжээ. Шалгалтын ажлын хэсэг Сэлэнгэ аймгийн Ерөө  сумын хоёрдугаар багийн нутаг “Баяны ар” гэх газар мод бэлтгэлийн үйл ажиллагааг явуулж байсан “Хүдэр Өсөх”-ийн үйл ажиллагаатай танилцсан байна.  “Хүдэр Өсөх”-ийн үйл ажиллагаатай танилцах явцад тус компани нь  501 ширхэг нойтон модыг хууль бусаар  бэлтгэсэн байсныг тогтоожээ. Түүнээс нарс 102 ширхэг, шинэс 399 ширхэгийг хууль  бусаар бэлтгэсэн байсан нь тогтоогдсон. Эдгээр модыг шонгийн модны хэрэгцээнд зориулж  зургаа, есөн метрын хэмжээтэйгээр тайрч огтолсон байсан гэнэ. Зарим тайрсан нойтон модоо Ерөө сумын төв дээр хадгалж байсан нь ч илэрчээ. Мөн  худалдан борлуулах гэрээ байгуулж, урьдчилгаа мөнгөө авчихсан байсан аж. “Хүдэр Өсөх” нэртэй тус компани нь мэргэжлийн үйл ажиллагаа явуулдаг гэж байгаа  боловч мод сонгон огтлолт болон  цэвэрлэгээ арчилгааны бүхий л стандарт журмуудыг зөрчсөн байсныг шалгалтын багийнхан онцолж байна. Тодруулбал,  5 га-гаар тогтоож татсан тусгаарлах талбайг дур мэдэн нэмэгдүүлж 24-30 га талбайн модыг хууль бусаар тайрч огтолсон байжээ.