Энэ сарын 04-ний өдөр Урган наран хорооллын орчимд ноцтой осол гарсан. Энэ дагуу эрүүгийн хэрэг үүсгэн шалгахад Б.Бямбацэрэн гэгч нь 2013 оны 12 дугаар сарын 04-ний өглөө үүрээр архи ууж согтуурсан үедээ Баянзүрх дүүргийн нутагт байрлах Ургах наран хорооллын урд замд “Х.Сонато-5” маркийн 24-23 УНЧ дугаартай автомашин жолоодож явахдаа иргэн Ж.Бадамцэцэгийн жолоодож явсан “Т.Чейзер” маркийн 42-63 НАА дугаарын автомашинтай мөргөлдөж, зорчигч Б.Хүрэлбаатарын биед хүнд, Х.Мөнхцэцэгийн биед хүндэвтэр гэмтэл, дээрхи автомашинд 8,466,000 төгрөгийн хохирол учруулсан нь тогтоогдсон байна.

Дээрх гэмт хэргийг үйлдсэн Б.Бямбацэрэнд холбогдох эрүүгийн 201324001299 дугаартай хэргийг тээврийн прокурорын газраас Эрүүгийн хуулийн 215 дугаар зүйлийн 215.3 дахь хэсэгт зааснаар зүйлчилж 79 тоот яллах дүгнэлт үйлдэж Дүүргийн Эрүүгийн хэргийн анхан шатны 1 дүгээр шүүхэд шилжүүлжээ.