Ер нь соёлын яамдууд болоод соёлын газруудаас мененжментийн гэрээгээр хувьчлагдсан урлагийн салбарууд цөөнгүй байдаг аж. Гагцхүү тэдгээр газрууд "Аса" цирк шиг хувьчлалынхаа гэрээг зөрчсөн үү, гэрээнд зааснаараа явж байгаа юу гэдэг сонин. Тиймээс эдгээр газруудад ШӨХТГ-аас анхаарлаа хандуулж ажиллаж байгаа юм.

    Мөн нийслэлийн өмчид харьяалагдаж байсан  томоохон кино театруудад хувьчлагдаж  зориулалтын бусаар олон жил үйл ажиллагаа явуулж байгаа. Тиймээс бид хүүхэд залуучуудын цагаа зөв боловсон өнгөөрөд тус нэмэр болох ёстой зарим соёлын газруудын хувьчлалын асуудлыг хөндөх гэж байна. Энэ удаад “Ард” кино театр хэзээ хувьчлагдаж, одоо үйл ажиллагаа нь ямар болсон талаарх мэдээллийг хүргье.
“Ард” кино театр бол  Монголын ууган соёлыг түгээх төв. Энэхүү кинотеарт хамгийн анх өргөн дэлгэцээр  кино урлагийн гайхамшгийг  иргэдэд  мэдрүүлж байсан бөгөөд  театрын суурь нь 1965 онд тавигдсан байдаг.  Манай улсын иргэдэд 30 гаруй жил соёл, урлагийг түгээж  байсан тус театрт 1996 онд менежментийн хувьчлал хийгдсэн. Менежментийн хувьчлалаар “Ард”-ыг авсан хүн нь Монгол Улсын гавьяат жүжигчин Д.Сосорбарам аж. Урлагийн хүн авсан учраас  кинотеатрыг өөд нь  татна гэж иргэд  итгэж, найдаж байсан.  Гэвч энэ байдал нь эсрэгээрээ эргэж, “Ард”-ыг мөнгө олох хэрэгслээ болгожээ.   Одоо бол  “Ард” гэж кинотеатр байхгүй.

Харин тэнд “Хас” банкны зээлийн болон  тооцооны төв байрлаж байна. Мөн бүжгийн сургалт, ломбард, канон, зурагчин, наториат, дохиолол хамгаалалтын компани, жуулчны газар гэх зэрэг  газрууд үйлчилгээ явуулж  байгаа юм. Ийм төрхтэй болж үлдсэн “Ард” кинотеатрыг тухайн үед менежментийн хувьчлалаар хувьчилж  байсан юм билээ. Эх сурвалжийн мэдээлж байгаагаар Монгол Улсын гавьяат Жүжигчин Д.Сосорбарам  “Ард” кинотеартыг хувьчилж авсан даруйдаа  эхнэрийнхээ нэр дээр "Анод" банкинд гурван тэрбум төгрөгөөр  худалдсан гэдэг.  Гэвч одоо  “Хас” банк  тухайн байрыг түрээсэлж үйл ажиллагаа явуулдаг юм байна.  Тэднийх эл газрыг нэг сарын 100 орчим сая төгрөгөөр түрээсэлдэг гэж зарим эх сурвалж хэллээ.

 Хувьчлагдсан гэх энэхүү кинотеатрын барилгад кино л үзүүлэх үйлчилгээ явагдаж байх ёстой.  Гэтэл өдгөө түрээсийн байр болон хувирсан нь гэрээг зөрчиж байгаа хэрэг юм.

Ер нь Менежментийн гэрээгээр тухайн авсан соёлын төвийнхөө үйл ажиллагааг улам боловсронгуй болгож,  хүний нөөц, ажиллах хүч зэрэг дээр анхаарч ажиллах үүрэг ч багтсан байдаг. Гэтэл “Ард” кино театрыг хувьчилж авсан хүн бол яахын аргагүй гэрээгээ зөрчиж байгаа юм. Юутай ч О.Магнай дарга менежментийн хувьчлалаар хувьчлагдсан зарим газруудыг шалгаад эхэлсэн талаар албан ёсны байр сууриа хэлж байсан. Тэгвэл түүний “онилсон” газрууд дунд яахын аргагүй “Ард” кино театр багтсан сурагтай. Магадгүй “Аса” циркийг дараагийн бай “Ард” кинотеатр гэдгийг эх сурвалжууд баталж байна.

    Өнөөдөр нийслэлийн хүн амын 70 орчим хувийг залуучууд эзэлдэг. Улмаар ихэнх залуус  баар цэнгээний газарт чөлөөт цагаа өнгөрөөж байна. Гэвч яг үнэндээ нийслэлд чөлөөт цагаа өнгөрөөх газар тоотой хэд. Тодруулбал,   зөвхөн кино театрын хувьд ярихад л “Тэнгис”, “Өргөө” I, II,  “Соёмбо” гэсэн дөрөвхөн  театр  л үйл ажиллагаа явуулж байна.   Гэтэл эдгээр газрууд хүүхэд залуучуудад чөлөөт цагаа өнгөрөөхөд тэр бүр хүрэлцдэггүй гэж хэлж болно. Иймээс зориулалтын бусаар ашиглаж байгаа кинокеатрын барилгыг нь буцааж хүүхэд  залуучуудын  чөлөөт цагийг зөв боловсон өнгөрүүлдэг газар болгох хэрэгтэй байна. Өөрөөр хэлбэл, хүүхэд, залууст зориулсан үйлчилгээний газрын барилгуудын хуудуутай хувьчлалыг эргэн харж,  соёл, урлагийн олон газрыг  зориулалтын дагуу сэргээмээр  байгаа юм.

Соёлын газруудын хувьчлал дээр дорвитой ажил зохион байгуулж, ард олонд нээлттэй мэдээлэх хэрэгтэйг ШӨХТГ, ССАЖЯ-ныхнаас иргэд хүсэмжилж байна. Юутай ч  “Аса” цирктэй адил гэрээгээ зөрчсөн, зөвхөн мөнгө олох хэрэгсэл болсон олон газрууд байгааг анхаарах нь зүйтэй биз ээ.

Бид дараагийн удаа Менежментийн хувьчлалаар хувьчлагдсан ч гэрээгээ зөрчсөн зарим газруудын талаарх сурвалжлагыг хүргэх болно.