Бага насны хүүхдүүдийг төрсөн эцэг нь аймшигтайгаар тамлан зовоосон жигшүүрт хэргийн талаар бид мэдээлсэн.  Уг хэрэг Сүхбаатар дүүрэгт үйлдэгдсэн бөгөөд  одоогоор хэргийг Сүхбаатар дүүргийн цагдаагийн хэлтэс шалгаж байгаа юм.

Хүүхдүүдийн эцэг Д гэгч нь эхийг нь хичээлдээ явсан хойгуур  хоёр хүүхдээ тамлан зовоож эхэлсэн байдаг. Тодруулбал,  2 настай охин болон 8 настай хөгжлийн бэрхшээлтэй хүүгээ өдөржин хазаж, боож, тамлан зовоосон байгаа юм. Хамгийн гол нь бага насны хоёр хүүхдээ  тамлан зодсон энэ иргэн сэтгэцийн хувьд эрүүл боловч  согтууруулах ундаа хэрэглэсэн байсан нь тогтоогджээ. Мөн зарим эх сурвалжийн хэлж буйгаар хүүхдүүдээ зодсон эцэг согтууруулах ундаа хэрэглэх бүртээ эхнэр,  хүүхдүүдээ дарамталж зоддог байсан аж.

Юутай ч уг хэргийн талаар ЦЕГ-ын  Хэвлэл мэдээллийн төвийн дарга, цагдаагийн хошууч Б.Баатархүүгээс тодруулахад “Ийм хэрэг гарсан нь үнэн. Энэ хэргийг Сүхбаатар дүүргийн цагдаагийн хэлтэс шалгаж байгаа” гэсэн мэдээллийг өгсөн юм.

 Харин уг хэрэгт Хүүхдийн төлөө үндэсний төвөөс нэлээд  анхаарал хандуулж, хүүхдүүдийг хамгаалалтад авахаар ярилцаж байгаа сурагтай. Мөн Хүүхдийн төлөө гарзаас хэрэгт холбогдогч Д-гийн  саатуулах хугацаа уржигдар  дуусгавар болсон учир  үргэлжлүүлэн хорих саналыг цагдаагийн байгууллагад хүргүүлсэн байна.

Хүүхдээ хазаж онц хэрцийгээр зодсон  Д нь  40 орчим настай бөгөөд хоёр настай охин, есөн настай хөгжлийн бэрхшээлтэй хүү, мөн 11 настай хүүтэй аж.  Харин эхнэр  Т нь хувиараа шүрэн эдлэлээр юм хийдэг , мөн энэ чиглэлээр их сургуульд суралцдаг аж.

    Ч.Ганжавхлан: Биднийг очиход насанд хүрээгүй хоёр хүүхдийн бие аймшигтай болсон байсан

Юутай ч хэргийг анх олон нийтэд дэлгэсэн гэж хэлж болох “Лантуун дохио” ТББ-ын тэргүүн   Ч.Ганжавхлангаас зарим зүйлийг тодруулахад  “Ээж нь бидэнтэй холбогдсон учир бид хохирогчдын ар гэрт очсон. Биднийг очиход насанд хүрээгүй хоёр хүүхдийн бие аймшигтай болсон байсан.  Манайхаас сэтгэлзүйн зөвлөгөө өгөн ажиллаж  байна. Харин  өмгөөлөгчийн  тусалцаа үзүүлэх боломжгүй байгаа. Иймээс  энэ төрлийн гэмт хэрэг дээр ажиллаж байсан, туршлагатай өмгөөлөгч ажиллуулахаар  Хүчирхийллийн үндэсний төвд хандсан. Гэвч өмгөөлөгчийн зардал мөнгөний асуудал хүндрэлтэй байгаа. Бид өмгөөлөгчийн зардлыг олох гэж олон нийтэд хандсан.  Олон нийт энэ ажиллагаан дээр нэлээд тусламж үзүүлэх байх. 

Одоогоор Д-д эрүүгийн хэрэг үүсгэн шалгаж байгаа. Тодруулбал, Эрүүгийн хуулийн 100.1 дүгээр зүйл ангиар шалгаж байгаа. Гэхдээ энэ зүйл заалтаар шийтгэх нь учир дутагдалтай байгаа юм. Учир нь энэ зүйл заалтаар хоёр жилийн ял шийтгэл оноодог. Бидний зүгээс танхайн сэдлээр гэдэг утгаар 181.2 гэсэн зүйл ангиар оруулах бодолтой байгаа. Тиймээс энэ хэрэг дээр сайн өмгөөлөгч өмгөөлөл үзүүлэх шаардлагатай байна. Мөн хүүхдүүдийг хамгаалах байраар хангахыг холбогдох байгууллагуудад хүсэлтээр уламжилсан. Ер нь ийм хэргүүд багассан тохиолдол байхгүй. Улам ихэссээр байна. Ил харагдаж байгаа нь л цөөхөн болохоос далдуур хэдэн ч хүүхэд хохирч байгааг бид мэдэхгүй” гэв.

Ер төрийн зүгээс энэ төрлийн хохирогчдод үнэ төлбөргүй  өмгөөлөл үзүүлэх хууль эрхзүйн тогтолцоо байдаггүй нь харамсалтай. Тодруулбал,  төрийн зүгээс төлбөрийн чадваргүй сэжигтэн, яллагдагчид өмгөөлөгчийг үнэ төлбөргүй томилж өгдөгөөс гэрч хохирогчид  үнэ төлбөргүй өмгөөлөл үзүүлдэггүй юм.

Мөн хохирогчдыг хамгаалах байраар хангах ёстой Тахарын алба ажил үүргээ яагаад биелүүлэхгүй байна гэдэг асуулт хөндөгдөж байгаа юм.

Тахар гэж нүсэр бүтэцтэй алба байгуулагдаад үйл ажиллагаагаа явуулж эхэлсэн. Гэтэл одоо болтол гэрч хохирогчийг хамгаалах ажлаа эхлүүлсэн үгүй нь тодорхойгүй байна. Тус хоёр хүүхдэд туслах боломж байгаа эсэхийг лавлахаар Тахарын албыг зориход Орлогч дарга нь гэх эмэгтэй гарч ирээд “Наад асуудлаа өөр албан тушаалтантай ярих ёстой”  хэмээн халгаасангүй.

Юутай ч Тахарын алба одоо болтол ажлаа жигдрүүлж, ийм төрлийн хохирогчдыг хамгаалалтандаа авахгүй байгаа иргэдийг бухимдлыг төрүүлж байна.