УИХ-ын дарга З.Энхболд өнөөдөр /2014.03.26/ Төрийн ордонд нээлтээ хийсэн хөгжлийн бэрхшээлтэй хүмүүсийн “Эрхийг бодит болгоё” Инчеоны стратегийг Монгол Улсад хүлээн авах үндэсний уулзалт, семинарит хүрэлцэн ирсэн хүндэт зочид, төлөөлөгчдөд хандан үг хэлж,  мэндчилгээ дэвшүүллээ. УИХ-ын дарга хэлсэн үгэндээ, манай улс хөгжлийн бэрхшээлтэй иргэдийг нийгмийн харилцаанд аливаа ялгаваргүйгээр тэгш оролцуулах нөхцөлийг бүрдүүлэх, тэдний өвөрмөц хэрэгцээнд түшиглэсэн нийгмийн хамгааллын тогтолцоог бий болгоход  байнга анхаарч ирсэн гээд Улсын Их Хурлаас 1995 онд анх удаа “Тахир дутуу иргэдийн нийгмийн хамгааллын тухай” хуулийг баталж, 2005 онд “Хөгжлийн бэрхшээлтэй иргэдийн нийгмийн хамгааллын тухай” хууль болгон шинэчлэн найруулж баталснаар хөгжлийн бэрхшээлтэй иргэдэд үзүүлэх нийгмийн хамгааллын арга хэмжээ, тэдэнд үзүүлэх тусламж, хөнгөлөлтийн асуудлыг шийдвэрлэх эрх зүйн орчныг  бүрдүүлсэн гэдгийн онцолсон юм.

Мөн тэрээр УИХ-ын  Аюулгүй байдал, гадаад бодлогын байнгын хорооны даргаар ажиллаж байхдаа 2008 оны 12 дугаар сард “Хөгжлийн бэрхшээлтэй иргэдийн эрхийн тухай” НҮБ-ын конвенцийг нэмэлт протоколын хамт Монгол Улсын Их Хуралд оруулж, соёрхон батлуулснаар хөгжлийн бэрхшээлтэй иргэд эрхээ бусдын адил эдэлж, нийгмийн харилцаанд орох боломж баталгаажсан гэдгийг хэлсэн үгэндээ тэмдэглэв. Энэ удаагийн Улсын Их Хурал 2013 оны 2 дугаар сард “Хөгжлийн бэрхшээлтэй иргэний нийгмийн хамгааллын тухай хуульд нэмэлт, өөрчлөлт оруулах тухай” хуулийг батлаж үүний дагуу “Эрүүл мэндийн тухай”, “Боловсролын тухай”, “Бага, дунд боловсролын тухай”, “Сургуулийн өмнөх боловсролын тухай”, “Нийгмийн халамжийн тухай” хуулиудад  нэмэлт, өөрчлөлт оруулсан юм. Ийм өөрчлөлт хийснээр хөгжлийн бэрхшээлтэй хүүхдийн эрүүл мэндийн тусламж, үйлчилгээ авах, сурч боловсрох, нийгмийн халамжийн үйлчилгээнд хамрагдах эрхийг бүрэн хангах боломжтой болсон билээ.

Цаашид УИХ-аар хэлэлцэн батлагдаж буй хууль тогтоомжийг “Хөгжлийн бэрхшээлтэй иргэдийн эрхийн тухай” НҮБ-ын конвенцийн үзэл санаа, зарчимд нийцүүлэн гаргаж, гарсан хууль, тогтоомж амьдралд ойр, хэрэгжих боломжтой байх бүхий л нөхцөл бололцоог бүрдүүлж ажиллана хэмээн УИХ-ын дарга З.Энхболд хэлээд Ази, Номхон далайн бүс нутгаас зарласан 3 дахь арван жилийн хүрээнд хөгжлийн бэрхшээлтэй иргэдийн "Эрхийг бодит болгоё" Инчеоны стратеги нь хөгжлийн бэрхшээлтэй иргэдэд үзүүлэх нийгмийн үйлчилгээнд дэвшил гаргах чухал баримт бичиг болсон гэдгийг цохон тэмдэглэв.
 Инчеоны Стратегийн хоёрдугаар зорилгод Улс төрийн болон шийдвэр гаргах үйл явцад хөгжлийн бэрхшээлтэй иргэдийн оролцоог дэмжихээр тусгасан нь тэдгээр иргэдийн сонгох, сонгогдох эрхээ эдлэхэд нь чухал хүчин зүйл болж, энэхүү 10 жилд хөгжлийн бэрхшээлтэй иргэд улс төрийн болон шийдвэр гаргах бүх түвшинд илүү өргөн хүрээтэй оролцох боломжтой болж байна.

УИХ-ын дарга үгийнхээ төгсгөлд Монгол Улс Ази, Номхон далайн бүсийн хөгжлийн бэрхшээлтэй иргэдийг дэмжих Инчеоны стратегийг дэмжиж, эдгээр зорилго, зорилтуудыг 2013-2022 онд хэрэгжүүлэх, улмаар хөгжлийн бэрхшээлтэй иргэдийн талаархи хууль эрх зүйн орчинг улам боловсронгуй болгож, хөгжлийн бэрхшээлтэй иргэд бусдын адил нийгэмд бие даан амьдрах, тэгш оролцох оролцоог шинэ шатанд гаргахын төлөө ажиллах болно гээд уулзалт, семинарын үйл ажиллагаанд амжилт хүсч, оролцогчдод эрүүл энх, ажлын амжилт, хамгийн сайн сайхан бүхнийг хүсэн ерөөлөө хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтэс мэдээлэв.