Төрсөн эцэгтээ яргалуулсан хоёр хүүхдийн талаар нийгэм тэр чигээрээ л ярьж байна. Улмаар хазуулсан хүүхдүүдэд зориулж хандивын мөнгө хүртэл цуглуулж эхэлсэн байгаа.

Тэгвэл тус хүүхдүүдэд аль хэдийнэ өмгөөллийн үйлчилгээ үзүүлээд эхэлчихжээ. Тодруулбал,  даваа гарагийн орой хохирогч хүүхдүүд өмгөөлөгчтэйгээ уулзан, анхны мэдээллээ өгсөн байна. Мөн өмгөөлөгчийн зардал олон нийтээс цугласан учраас Хүчирхийллийн эсрэг үндэсний төв, хохирогч, өмгөөлөгч нар гурвалсан гэрээг байгуулах аж. Тус хэрэг нь олон шатны шүүхээр дамжих магадлалтай, ярвигтай хэрэг учраас өмнө нь олон жил ажиллаж байсан туршлагатай, гэр бүлийн хүчирхийллийн хэргээр мэргэшсэн өмгөөлөгч сонгогдон ажиллаж байгаа гэдгийг "Лантуун дохио" ТББ-ын тэргүүн Ч.Ганжавхлан хэллээ.

Харин үнэ төлбөргүй өмгөөллийн үйлчилгээ үзүүлэх санал тавьсан хүмүүс Хүчирхийллийн эсрэг үндэсний төвөөр дамжуулан хохирогчийн өмгөөлөгчтэй холбогдож болох бөгөөд тэнд ялгаагүй аймшигт хүчирхийллийн золиос болсон 10 гаруй хүний хэрэг өмгөөллийн зардалгүй гэсэн шалтгаанаар гацаанд орсон байгаа учир тэдэнд ч гэсэн тусламж үзүүлж болох аж.

Харин "Лантуун дохио" ТББ уг хэрэг дээр үндэслэн бусад хүүхдийн эрхийг хамгаалах, хөршийн хариуцлага, хүүхдийн утас, хөгжлийн бэрхшээлтэй хүүхдийн эрхийн асуудал, хууль эрх зүйн орчин гэх мэт асуудлыг хөндсөн олон нийтийн нөлөөллийн ажлыг хийхээр төлөвлөөд байгаа аж.