"2008 оны долдугаар сарын 1”-ний үймээний хэрэгт ЦЕГ-ын даргын үүрэг гүйцэтгэгч асан, хошууч генерал Ч.Амарболд, Нийслэлийн цагдаагийн газрын дарга асан, хурандаа О.Зоригт, ЦЕГ-ын Хэв журмын хэлтсийн дарга асан, хурандаа Ш.Батсүх нарыг буруутган ялласан. Эрүүгийн хуулийн 274, 294-т зааснаар албан үүргээ зохих ёсоор хэрэгжүүлээгүй, галт зэвсэг тараасны улмаас дөрвөн хүний амь нас хохирсон хэрэгт буруутган яллаж байсан билээ. Хурандаа О.Зоригт шүүхээс 2.6 жилийн хорих ялаар шийтгүүлсэн ч биеийн байдал тааруу гэх шалтгаанаар оны өмнө суллагдсан.  Харин Ч.Амарболд генерал магадлангаар суллагдаад гурав хонож байна. Тэгвэл хурандаа Ш.Батсүхийн хувьд магадланд хамрагдах хугацаа болоогүй гэж эх сурвалж мэдээлж байгаа юм. Тодруулбал, тэрбээр хүнд өвчтэй, нэлээд хугацаанд хорих ангийн эмнэлэгт  эмчлүүлсэн аж. Эмнэлэгт хэвтсэн хугацаа нь ялын хоногт тооцогдоогүй учраас шүүх магадлангийн хурлаар түүнийг суллах, эсэх асуудлыг хэлэлцүүлэх боломж хараахан бүрдээгүй гэж прокурорын байгууллагын эх сурвалж мэдээллээ.