УИХ-ын дарга З.Энхболд "давхар дээлтэй" сайд нарт албан бичиг явуулж "дан дээлийн" хуулийн санал хураалтанд ашиг сонирхолын зөрчил бий эсэх, санал хураалтанд оролцох эсэхийг бичгээр саналыг нь авна гэж мэдэгдсэн. Тэгвэл давхар дээлтэй 17 сайдаас уг албан бичигт Ц.Баярсайхан сайд анхны хариуг илгээлээ. Тэрээр "давхар дээлээ тайлахыг дэмжиж байгаа, хуультай холбоотой санал хураалтанд сайд нар оролцох нь хуульд нийцнэ, ашиг сонирхолын зөрчил биш" гэж үзэж байгаа ч хуулийг хэзээнээс хэрэгжүүлж эхлэх тухай санал хураалтанд оролцохгүй гэсэн утгатай хариуг ирүүлжээ. Ийнхүү давхар дээлтэй сайд, гишүүдийн санал хураалтанд сайн дураараа татгалзсан анхны хүн Ц.Баярсайхан болж байна. УИХ-ын даргаас гадна МАН-ын бүлгээс давхар дээлтэй гишүүдэд санал хураалтанд оролцохгүй байх шаардлагыг хүргүүлээд байгаа ч одоогийн байдлаар Ц.Баярсайхан гишүүнээс өөр хариу ирүүлсэн хүн алга байна.