Хөгжлийн бэрхшээлтэй хүүхдийн сургууль болох 116 дугаар сургуулийн удирдлага, багш ажилчид хараагүй хүүхдүүдийг хөдөлмөрийн мөлжлөгт оруулаад байгаа талаарх мэдээллийг уг сургуульд ажиллаж байсан иргэдээс мэдээлэл хийлээ.

Харааны бэрхшээлтэй хүүхдүүдийн сурдаг 116 дугаар сургуулийн удирдах ажилтнууд хүүхдүүдийг хөдөлмөрийн мөлжлөг оруулж, хувьдаа мөнгө завшдаг болоод багагүй жилийг үджээ.

Тодруубал, Боловсролын болон Эрүүл мэндийн тухай хуулиар хөгжлийн бэрхшээлтэй хүүхдийн асуудлаар ч энэ сургуульд багагүй зөрчил үүсээд байгаа аж. Тухайлбал, харааны бэрхшээлтэй хүүхдүүдийн авьяас, ур чадварыг ашиглан хөдөлмөрийн мөлжлөгт оруулсан явдал аль 2011 оноос эхэлсэн байна. Өөрөөр хэлбэл, хандивын тоглолт зохион байгуулж хүүхдүүдээр мөнгө олж байгаа хэрнээ тухайн хүүхдүүд тоглолтын орлогоос өгдөггүй талаар хуульч А.Балдангомбо онцлов.

Тус сургуулийн удирдлагууд эхний ээлжинд хандивын тоглолтонд оролцож байгаа хүүхдүүдтэй гэрээ байгуулдаг байна. Улмаар гэрээнээсээ татгалзах гэхээр эргүүлээд мөнгө төгрөг нөхдөг байх жишээтэй. Өөрөөр хэлбэл, чамайг хандивын тоглолтонд оролцуулахын тулд бэлтгэл сургуулилт хийсэн. Чиний төлөө маш их мөнгө төлсөн учир чамаас эргүүлээд шүүхээр мөнгө нэхэмжилнэ гэж айлган, дарамталж, гэрээгээ цуцлах боломжгүй болгодог байна.

Энэ асуудлаар хуульч А.Балдангомботой уулзаж ярилцахад “116 дугаа сургуулийн захирал С.Энхтуяа төрийн удирдах албан тушаалтны ёс зүй, төрийн албан хаагчийн зарчимыг хэзээ ч баримталж ажиллаж байгаагүй асуудал 2008 оноос хойш үүссэн. Улмаар тухайн сургуулийн ажилчид удирдлагуудынхаа энэ байдлыг ХЭҮК-т хүртэл мэдэгдсэн байдаг. Гэвч хүний эрхийн комиссоос холбогдох байгууллагуудад санал тавьж байсан ч зөвөөр шийдэгдэж байгаагүй юм билээ. Учир нь энэ хүний хууль бус үйлдлийг хамгаалж, хаацайлдаг тойрон хүрээлэгчид бий болсон байна. Үүнийг баталж өөрийнхөө тойрон хүрээлэгчдээр төрийн удирдлага, шийдвэр гаргагчдын өмнөөс турхирч өлсгөлөн зарлуулж байсан удаатай” гэв.

Мөн уг сургуулийн удирдлагууд хөгжмийн багш мэргэжилтэй хүнээр англи хэл, мэдээлэл зүй гэдэг хичээл заалгасан нэрээр сул цалин олгодог байна. Тодруулбал, хөгжмийн багш Н.Батболдоор долоо хоногийн хоёр цаг англи хэл, хоёр цаг мэдээлэл зүй хийлгэнэ гэж тусгасан байна. Гэвч энэ хичээлүүд нь сүүлийн зургаан сар ороогүй хэрнээ сул цалин аваад явж байгааг хуралд оролцогсод мэдээллээ.
М.Жанебек: 116 дугаар сургуулийн удирдлагууд 20 гаруй хүүхдийг хөдөлмөрийн мөлжлөгт оруулж байна

Юутай ч уг зөрчлийн талаар тус сургуулийн нийгмийн ажилтан асан М.Жанебекээс зарим зүйлийг тодрууллаа.

-116 дугаар сургуулийн удирдлагууд хөгжлийн бэрхшээлтэй хүүхдүүдээс мөнгө завшиж байна гэсэн. Энэ яг үндэслэлтэй юу?
-116 дугаар сургуулийн захирал Сүхбаатарын Энхтуяа, хөгжмийн багш Н.Батболд гэх мэт хүмүүс хүүхдүүдийг 2011 оноос хойш хөдөлмөрийн мөлжлөгт оруулж эхэлсэн. Өөрөөр хэлбэл, 10 гаруй багш нар 2011 онд цалингийн зээл авч Солонгос явсан. Солонгоос ирээд цалингийн зээлээ дарах шаардлага гарсан учир цалингийн зээлээ дарахын тулд хүүхдүүдээр тоглолт хийлгүүлж эхэлсэн байгаа.

Ингэхдээ нийслэлийн их дээд сургууль, хөдөө орон нутагт хүүхдүүдээр тоглолт хийлгэж мөнгө олж эхэлсэн. Улмаар цалингийн зээлээ дарсан дахин хүүхдүүдээр тоглолт хийлгэж мөнгийг нь хувьдаа хуваан завшдаг болсон.

-Тоглолтонд оролцсон хүүхдүүдэд ямар ч мөнгө төгрөг өгдөггүй юм уу?
-Хүүхдүүд ямар мөнгө өгдөггүй. Харин өнгөрсөн өвөл Хөвсгөл явж тоглолт хийхдээ төгсөх ангийн хоёр сурагчид 100 мянган төгрөгөөр хувцас авч өгсөн байсан. Хөвсгөл явах замдаа, бас буцахдаа сумдуудаар тоглолт хийсэн байсан. Тухайн тоглолтон дээр хөгжлийн бэрхшээлтэй хүүхдийн бие нь сульдаж, унах тохиолдол гарч байсан. Гэтэл удирдлагуудын зүгээс хүүхдүүдийг “Битгий маяглаад бай, босоод дуугаа дуул” гэх шаардлагуудыг тавьж байсан.

-Ер нь нэг тоглолтоос хэчнээн төгрөгний ашиг олдог бол?
-Миний тооцолсноор нэг тоглолтоос 2-3 саяыг олдог байх.

-Багш нар ингэж мөнгө олж байгаагаа хэлж байсан уу?
-Хөгжмийн багш Н.Батболд байгууллагын хурал дээр “Би тоглолтоос 700 мянган төгрөг л олсон” гэж ам алдаж байсан.

-Та нарын зүгээс холбогдох хуулийн байгууллагуудад хандсан уу?
-АТГ, ХЭҮК зэрэгт захирал С.Энхтуяагийн талаар гомдол гаргасан.

-Хэчнээн хүүхдүүдийн хөдөлмөрийн мөлжиж байгаа юм бол?
-Манай сургууль одоогоор 60 хүүхэдтэй. Тоглолтонд 20 гаруй хүүхэд оролцдог.

-Өнгөрсөн хугацаанд хэчнээн тоглолт болсон бэ?
-2011  оноос хойш одоо хүртэл тоглож байгаа. Ойролцоогоор 30-40 тоглолт хийсэн. Энэ сарын 7-нд ЭМШУИС дээр тоглолт хийхээр яригдаж байгаа гэсэн.

-Хүмүүс тоглолтыг нь хэр үздэг юм бол?
-Ялангуяа оюутнууд их үздэг. Нэг удаагийн тоглолтын билет 2000-3000 төгрөг байдаг.

-Хүүхдүүдийн ар гэрийнхэн мэдэж байгаа юу?
-Хүүхдүүдийн ар гэрийнхэн мэдэж байгаа ч удирдлагууд руу юм хэлж чаддаггүй. Учир нь ихэвчлэн төгсөх ангийн хүүхдүүд байдаг учир хүүхдүүдээ боддог байх. Мэдээж хүүхдүүд энэ тоглолтоос болж хичээл сургуулиасаа хоцрох, сургалт нь муудах зүйл байгаа.

-Хүүхдүүд өөрсдөө тоглолтонд оролцохгүй гэвэл яадаг юм бол?
-Хичээл номоор шахаж, янз бүрийн дарамт үзүүлдэг. Намайг нийгмийн ажилтан хийх хугацаанд тоглолтонд оролцохгүй гэж хэлсэн хүүхдийг бүх багш над гадуурхаж, доромжилж байсан.

-Таны хувьд ажлаасаа ямар шалгаанаар гарсан юм?
-Манай байгууллагын нярав, бид хоёр ажлаасаа гарсан. Бидний хувьд удирдлагуудын энэ байдлыг эсэргүүцэж өөрсдөө ажлаа өгсөн.

-Хүүхдүүдийг мөлжих ажилд захирлаас чин гална яг ямар хүмүүс холбогдож байгаа вэ?
-Захирал, хөгмийн багш, эмч нар, нягтлан, сургалтын менежер бүгд хамсаатнууд.