Эрчим хүчний яам, МХЕГ хамтран нийслэлд цахилгаан дамжуулах агаарын болон кабель шугам, дэд станцын хамгаалалтын зурвасын байдлыг шалгалаа.  

Шалгалтад Баянгол, Сонгинохайрхан, Хан-Уул, Баянзүрх, Чингэлтэй дүүрэгт 50 гаруй км урт цахилгаан дамжуулах агаарын болон кабель шугам, 9 дэд станц, хамгаалалтын зурваст гэр, орон сууц, барилга байгууламж барьсан, зурвас газрыг чөлөөлөх тухай мэдэгдэл, улсын байцаагчийн албан шаардлагыг биелүүлээгүй, шугам сүлжээний аюулгүй байдал, хэвийн найдвартай ажиллагаанд осол, эрсдэл гарч  болзошгүй нөхцөл бүрдүүлсэн 35 иргэн, 27 аж ахуйн нэгж, байгууллага хамрагджээ.

Хамгаалалтын бүсэд үйлчилгээний байр, хашаа барьж, автомашины зогсоол бий болсон зэрэг 32 зөрчил илрүүллээ. Эдгээр зөрчлийн 10-ыг газар дээр нь арилгуулан, улсын ахлах байцаагчийн 22 албан шаардлага гаргаж, 5,5 сая төгрөгийн торгууль ногдуулсан байна. Мөн Эрчим хүчний яам, Нийслэлийн Засаг дарга бөгөөд Улаанбаатар хотын захирагчид улсын ахлах байцаагчийн дүгнэлт, “Цахилгаан дамжуулах үндэсний сүлжээ” ТӨХК, “Улаанбаатар цахилгаан түгээх сүлжээ” ТӨХК-д хугацаатай албан шаардлага хүргүүлжээ.

Хот байгуулалтын тухай, Эрчим хүчний тухай хууль, холбогдох дүрэмд зааснаар инженерийн шугам сүлжээний хамгаалалтын зурваст гэр, орон сууц, барилга байгууламж барих, шугам сүлжээг өмчлөгч, эзэмшигчийн зөвшөөрснөөс бусад үйл ажиллагаа явуулахыг хориглодог юм.