Орчин үед ухаалаг гар утасны хэрэглээ боловсронгуй болж, зураг авах хэлбэр ч өөрчлөгдөж байгаа билээ. Тэгвэл бусдын оролцоогүйгээр гэрэл зургаа авах нэгэн шинэ аргыг танилцуулж байна. 
    Хүмүүсийн хоорондын харилцааг улам дотно болгож, хөгжилтэй ухаалаг аргаар гэрэл зураг авах төхөөрөмж бий болжээ. Австрийн “taliaYstudio” хэмээх студийн эзэн Талиа Рэдфорд товчлуур дарахын оронд бие биенийгээ үнсэж, улам ойртож зураг авахуулах боломжийг танилцуулж байна. “Дэвшилтэт технологийн ачаар юм бүхэн хурдан өөрчлөгдөж байна. Тиймээс бид тавин жилийн өмнөөс хэрэглэж ирсэн товчлуур дарах аргаасаа салах хэрэгтэй” хэмээн Талиа ярьжээ.

Талиагийн студид зураг авахуулах гэж буй хоёр хүн гар гараасаа барилцан, үнсэлцэхээр тохируулсан бүхээг бий. Энэ бүхээг дотор дугуй хэлбэртэй электрон төхөөрөмжүүд байрлана. Энэ төхөөрөмжөөр хосууд өөрсдийгөө толидон харж байгаад зургаа даруулж болох юм. Microsoft компанийн Xbox 360 системээс санаа аван бүтээсэн “Kinect” гэдэг төхөөрөмж нь таны хөдөлгөөнийг өөрөө мэдэрч, автоматаар зураг дарах болно. Ингэснээр хүнээр зураг даруулах биш, өөрийнхөө царайг харж байгаад хүссэн хөдөлгөөнөө хийх боломжтой. 
Энэ технологиор зураг авуулахад хүмүүс заавал үнсэлцэх албагүй. Хамт олноороо цугларч, бие биендээ сайхан уур амьсгал бэлэглэнгээ зургаа даруулах боломжтой. Энэ нь үгээр хэлж боломгүй мэдрэмжийг үйл хөдлөлөөрөө бие биедээ өгөх боломжийг олгож байгаа хэмээн Талиа ярьж байна.