Хэрэглэгчдээ хохироож, башир аргаар луйвар хийдэг зарим супермаркетуудыг ШӨХТГ-аас олонд зарласан. Тэдний нэг нь “Миний” супермаркет юм. ШӨХТГ-аас дээрх мэдэгдлийг хийсэн даруйд тус дэлгүүрийн захирал “Манайх бол луйвар хийдэггүй. Хэрэглэгчдээ хохироодог газар биш. О.Магнай чамтай би үзэж, тарна” гэх мэтээр хэвлэлээр ярьж, дуулиан тарьсан. Гэтэл тус дэлгүүр хэрэглэгчдээ хүндэтгэдэггүй бас хохироодог гэдэг нь батлагдлаа. Тухайлбал “Миний” супермаркетын Цайз дахь салбараар үйлчлүүлсэн нэгэн иргэн манай сайтад хандсан юм. Уг иргэн нийт 30 мянган төгрөгийн худалдааг тус дэлгүүрээс хийсэн байна. Ингээд кассан дээр мөнгөө төлөөд тооцооны хуудсаа шалгах гэтэл ямар ч бичиггүй цагаан цаасыг өгчээ.

Уг нь аль ч супермаркетаар үйлчлүүлсэн үйлчлүүлэгч худалдан авсан барааныхаа үнийг цаасан дээрх үнэтэй тулгах эрхтэй билээ.

Эл бичгийг маш хурц нарны гэрэл дор харвал бүдэгхэн мөр харагдах бөгөөд хараа муутай хүмүүс  битгий хэл сайтай нь ч олж харж чадахааргүй аж. Түүнээс гадна Нарантуул захад 5800 төгрөгөөр зарагддаг хоёр кг-ийн "Миф" угаалгын нунтаг тус дэлгүүрт 12 000 төгрөгөөр зарагдаж байна. Зөвхөн ганц угаалгын нунтгийг нэг дахин нэмсэн үнээр зарж байна гэдэг нь шударга өрсөлдөөний хуулийг зөрчиж байгаагаас гадна иргэдийг хохироож буй үйлдэл мөнөөсөө мөн билээ. Хэдийгээр хаанаас, хэдэн төгрөгөөр ямар бараа авах нь тухайн хүний өөрийнх нь мэдэх асуудал ч барааны үнийг бүтэн нугалж зарж буй нь иргэд л хохирч буйн жишээ. Бас дээрээс авсан барааныхаа үнийг талонтой харьцуулж харах ёстой байтал хоосон цаас өгч буй нь тус дэлгүүрийн ноцтой зөрчил юм. 

Мөн төмс, сонгино гэх хүнсний ногоо нь зөөлөрч муудсан байсан гэдгийг ч тус дэлгүүрээр үйлчлүүлсэн иргэн хэлж байна.