Буддын шашны хамгийн эртний хийдүүдийн нэг Өвөрхангай аймгийн Хархорин сум дахь Эрдэнэ зуу хийдийн “Эрдэнэ зуу” музейд хулгай орсон талаарх яриа өчигдөржин иргэдийн ярих ярианы сэдэв болов. Эх сурвалжийн мэдээлж буйгаар хийдийн музейгаас долоон ширхэг бурхан алдагдсан бөгөөд тэдгээр нь хөөмөл жавилтай, их бие болон суурь нь алтан шахмал, цутгамал, 22.8 кг жинтэй Дүйнхор бурхан, 1.595 кг жинтэй, гууль цутгамал, алтан шармал Жүгдэрнамжил бурхан, зэс хөөмөл, алт шармал 1.230 кг жинтэй Майдар зэрэг бурхад байжээ.
Хэргийн талаар цагдаагийн байгууллагаас тодруулахад "Хулгайн хэрэг гарсан нь үнэн. Тавдугаар сарын 18-19-нд шилжих шөнө үйлдэгдсэн. Хэрэгтнийг эрэн сурвалжлах ажил үргэлжилж байна" гэв.
Дашрамд хэлэхэд, алдагдсан үнэт зүйлсийн талаарх мэдээллийг өндөр үнээр худалдаж авч байгаа юм байна. Мөн алдагдсан бурхадын үнэ 10 сая төгрөг болно гэдгийг зарим эх сурвалжууд хэллээ.