Монголчууд төдийгүй дэлхийн улс орны хүмүүс спорт, тэр дундаа хөлбөмбөгийн тэмцээнийг хамгийн ихээр шимтэн үздэг болоод удаж байна. Тийм ч учраас дөрвөн жилд нэг удаа болдог дэлхийн хөлбөмбөгийн аварга шалгаруулах тэмцээнийг нутагтаа зохион байгуулахыг хүсэгчид олон арван шалгууртай нүүр тулдаг. Хэрэв тухайн улс хөлбөмбөгийн аварга шалгаруулах тэмцээнийг өөрийн нутагтаа зохион байгуулах эрхийг авч чадвал өндөр хариуцлагатай тулах ч энэ хэмжээний ашиг, орлогыг авчирдаг гэхэд болно.  Адаглаад тухайн улсад ирэх жуулчдын тоо нэмэгдэж, тэр хэмжээгээр орлогын нөөц бүрддэг гэдгийг хэн хүнгүй л мэдэж байгаа.

Тэгвэл тэр бүр хөлбөмбөгийн аварга шалгаруулах тэмцээнийг яг дэргэдээс нь үзэж, сэтгэл ханамжийг авч чадахгүй хүмүүс цөөнгүй бий. Харин тэдгээр хүмүүст зориулж яг дэргэдээс нь үзэж байгаа мэт сэтгэгдлийг төрүүлэх үүрэгтэй  “цэнхэр дэлгэц” гэж бас байна аа.  Тиймээс дэлхийн хэмжээнд болж буй, хүмүүсийн сонирхолыг асар их татдаг тэмцээн уралдаан, олимп, дэлхийн аварга шалгаруулах гээд л томоохон хэмжээний гэсэн тодотголтой бүгдийг  шууд дамжуулах эрхийг авахаар орон орны телевизүүд ч хамаг л арга сүйхээгээ ашигладаг.
Яг л нутагтаа аварга шалгаруулах тэмцээнийг зохион байгуулах гэж буй улс шиг бусдаас илүү давуу эрхийг олж авахаар телевизүүд ч багагүй шалгууртай тулгардаг гэхэд болно.

Тэгвэл энэ удаагийн Бразилд болох хөлбөмбөгийн аварга шалгаруулах тэмцээнийг шууд дамжуулах эрхийг манай улсаас ETV телевиз  авсан. Өөрөөр хэлбэл, хөлбөмбөг сонирхогчдын тэсэн ядан хүлээж буй хөлбөмбөгийн дэлхийн аварга шалгаруулах тэмцээний эрхийг авсан цорын ганц телевизээр ETV-г цоллосон. ЕТV-г МҮОНРТ-ээс багагүй асуудлыг дагуулж ажлаа өгсөн Ч.Даваабаярын телевиз гэдгээр нь хүмүүс ч андахгүй.

Тэгвэл уг телевизийнхэн хөлбөмбөг дамжуулах эрхийг ганцаараа давуу эрхтэйгээр аваад зогсохгүй бусдад “эрх” олгох мөнгөний ажлыг ч хийхээр болжээ. Өөрөөр хэлбэл, хөлбөмбөгийн аваргыг шууд дамжуулах ETV телевизийг тохируулан үзэгчид, үйлчлүүлэгчдийг "татаж" ажиллах паб, караоке, лоинж, задгай талбай, цэнгэлдэх зэрэг газрууд “зарим” эрхээ ETV  телевизээс авах ёстой болж байгаа гэнэ.

Манай улсад хөлбөмбөгийн аварга шалгаруулах тэмцээнийг гэрээсээ бусад газар үзэж байгаа хэн боловч архи согтууруулах ундааг дуртай цагтаа хэрэглэх хориотой байдаг. Өнөөх архидан согтуурахын эсрэг хуулиндаа шөнийн 00.00 цагаас хойш ямар ч олон нийтийн цуглардаг газар архи согтууруулах ундааг хэрэглэж болохгүй журмыг тусгасан.

Гэтэл ETV телевизэд хуулиас гадуур зүйл хийхийг эрх баригчид зөвшөөрсөн байгаа нь зарим иргэдийн гайхширлыг төрүүлж байна. Тодруулбал, уг телевизээс 500000-7 сая төгрөгний бичгийг худалдаж авсан аж ахуй нэгж өглөө болтол ажиллаж архи согтууруулах ундаа зарж, яаж л бол яаж ашиг олж болох нь ээ. Үнэхээр энэ нь хууль тогтоомж зөрчөөгүй юм бол одоо юунд ажилладаг хэдийгээ торгож гүйдэг юм бол гэж иргэд ярьж байна.

Энэ тухай “Үндэсний тойм” сэтгүүл дээр ч цохон тэмдэглэжээ.

Хөлбөмбөгийн дэлхийн аварга шалгаруулах тэмцээний үеэр шөнө дөлөөр бүү хэл өглөөний 07.00 цаг хүртэл шар айраг, дарс зарах эрхийг зарж байгаа юм байна. Даанч төр маань шөнийн 24 цагаас хойш хоносон хар цайнаас гашуун л бол юу ч зарж болохгүй, хаалга үүдээ барь, торгоно хаана гэж аашилдаг хэрнээ нэг аж ахуйн нэгжийн 500000-7 сая төгрөгөөр зарж буй бичгийг худалдаад авчихвал нар мандтал ажиллаж болно, худалдаж авахгүй бол 24 цагтаа хаа гэж шаардах нь өнөөгийн хууль тогтоомж, засаг захиргааны ёс зүй, хэм хэмжээ, ашиг сонирхолын зөрчил гэх мэтэд хэр нийцэж байгаа юм бол доо?

Монгол Улсын үндсэн хуулинд хүн төрөлхтний соёл иргэншлийн нийтлэг ололтыг хүндэтгэнэ гэсэн зарчим байдаг. Энэ зарчмыг бодолцоод С.Батболд Ерөнхий сайд байхдаа 2012 оны Европын хөл бөмбөгийн аварга шалгаруулах тэмцээний үеэр шөнийн цагаар хөлбөмбөгийн тэмцээн үзүүлж байгаа газруудад шар айргаар үйлчлэхийг зөвшөөрч байсныг та бүхэн санаж байгаа байх.  Энэ нь архидан согтуурахыг эсрэг хуультай нийцээгүй ч дээрх зарчмаас гажаагүй.
 Гэтэл Улаанбаатар хотын дарга Э.Бат-Үүл хувийн компанид хөл бөмбөгийн аварга шалгаруулах тэмцээнийг шууд дамжуулах эрхийг өгсөн. Улмаар тэр зардлаа нөхөхийн тулд тухайн телевизээс зөвшөөрөл өгсөн газруудад төрийн шийдвэрээ зарах гэж байна.