Ерөнхий сайд асан Н.Алтанхуягийн туслахаар ажиллаж байсан М.Тулга өнөөдөр батлан даалтад гарлаа. Тэрээр 10 хоногийн өмнө ШШГЕГ-ын харьяа 461 дүгээр ангиас “Скай эмнэлэг” рүү шилжин эмчилгээ хийлгэж байсан юм.
Түүний биеийн байдал тун тааруу, хөл нь мэдээгүй болоод хоёр сарын хугацаа өнгөрсөн ч АТГ-аас ар гэр болон өмгөөлөгчдийнх нь батлан даалтад гаргах хүсэлтийг хүлээн авахгүй байна гэж мэдэгдэж байсан ч ийнхүү батлан даалтад гаргажээ.
Хэдийгээр М.Тулгын өмгөөлөгч Ц.Баасандорж, АТГ-ын хооронд ширүүхэн тэмцэл болж байсан ч Ц.Баасандорж өмгөөлөгч үйлчлүүлэгчээ батлан даалтад гаргаж чадсан байна. Хэрэв М.Тулгыг батлан даалтад гаргаагүй бол түүний амь насанд аюул учрах байсныг эх сурвалжууд мэдээлж байна. Учир нь эмнэлгийн эмчийн хэлснээр хоёр сар гаруй хугацаанд хөл нь мэдээгүй байхад ямар нэг эмчилгээ хийгдээгүй учраас одоо эмчилгээ хийхэд хүндрэлтэй байна гэж мэдэгдсэн юм. Уг эмнэлэг нь БНСУ-ын ардын эмчилгээ хийдэг юм байна. Өдөрт 20 ширхэг зүү хөлөндөө тавиулдаг ч одоо хүртэл мэдээ орохгүй байгаа гэж ар гэрийнхэн нь хэлж байна.