Ардчилсан нам 4 дүгээр сарын 11-ний өдөр цаг үеийн асуудлаар мэдээлэл хийлээ. Хэвлэлийн хуралд АН-ын дарга, УИХ дахь АН-ын бүлгийн дарга О.Цогтгэрэл, УИХ-ын дэд дарга Б.Пүрэвдорж, АН-ын Ерөнхий нарийн бичгийн дарга С.Баярцогт, АН-ын дэд дарга Н.Ганибал, Л.Мөнхбаясгалан, Д.Энхтуяа, Ч.Өнөрбаяр, П.Мөнхтулга нар оролцов.
АН-ын Ерөнхий нарийн бичгийн дарга С.Баярцогт мэдээллийн үеэр хэлэхдээ:
“Ардчилсан нам бол ард түмнээсээ эхтэй нам. Сүүлийн 4-5 сарын хугацаанд шинэчилсэн бүртгэл, зохион байгуулалт, Үндэсний бодлогын хорооны сонгууль, Их хурлаа амжилттай зохион байгуулж, Хэрэг эрхлэх зөвлөлөө байгуулах ажлыг үе шаттайгаар хийж, өчигдрийн хурлаар шийдвэрлэж чадлаа.
АН бол олон ургалч үзлийг эрхэмлэдэг нам. Сонгогдсон таван дэд дарга нь нам доторх таван фракцын төлөөлөл болж байна. Энэ нь эв нэгдлийн төлөө нэгдэж чадсаны илэрхийлэл гэж үзэж байна.
Удахгүй болох аймаг, дүүргийн нөхөн сонгууль 5 аймаг, 43 суманд болно. Бид бэлтгэл ажлаа хэдийнэ эхлүүлсэн. Ардчилсан намын хувьд энэ сонгууль бол дараагийн том улс төрийн анхны шат байх болно” гэв.
