Монгол улс Үндсэн хуулиа баталснаас хойш анх удаа “эх орноосоо урвасан”, “төрийн нууц задруулсан” хэргээр УИХ-ын Тамгын газрын Гадаад харилцаа, хамтын ажиллагааны хэлтсийн зөвлөх асан Ц.Жаргалсайханыг шалгаж, ял оноосон нь нэг хэсэгтээ шуугиан тарьсан. Ахмад дипломатч Д.Цахилгааны хүү ийм хэрэгт холбогдсон нь олон хүнийг гайхашруулж байсан юм. 2010 оны хавар Ц.Жаргалсайхантай хамт төрийн тэргүүнүүдийн айлчлалын хөтөлбөр болон бусад улсын нууцын зэрэглэлтэй мэдээллийг гадныханд дамжуулсан хэрэгт Гадаад харилцааны яамны Хөрш орнуудын газрын хоёрдугаар нарийн бичгийн дарга асан Г.Байгальмаа, Г.Сувд-Эрдэнэ гэдэг хоёр эмэгтэй холбогдож байсан билээ. Тэднийг шүүх хурлын явцад холбогдолгүй гэж хэргийг хааснаар хоёр жилийн нүүр үзэж байна. Тэд ч өнөөдөр ажил, амьдрах орчноо сольжээ.

   Ц.Жаргалсайханыг санаатайгаар улсын нууц материалыг дамжуулж байсан гэж үзсэн тул хаалттай хуралдаж таван жил хорих ял оноосон. Харин хамт ажиллаж байсан Г.Байгальмаа, Г.Сувд-Эрдэнэ нар нь өнөөдөр Хятад дахь Монголын ЭСЯ-нд өндөр албан тушаалд тухалж байгаа нь бодитой үнэн юм. Тэд дээрх хэргээс хойш Бээжинд томилогдож улс төрийн болон худалдааны алба хариуцан хятадуудтай хамтран ажиллах болжээ. Энэ хоёр жилийн хугацаанд тэдний тухайд хэн ч дурссангүй. Төрийн нууц задруулсан хэрэгт холбогдож байсан хүмүүс биднийг хамгийн их танадаж байдаг БНХАУ-ын ЭСЯ-нд ажиллаж байгааг нэг ч сөхсөнгүй. Учир нь Хөрш орнуудын газрын хоёрдугаар нарийн бичгийн дарга асан Г.Байгальмаа нь МАН-ын генсек У.Хүрэлсүхийн хүн тул гадаадад ажиллах томилолтоор хөшүүрэгдэж дээрх хэргээс зайлжээ. Тэрбээр Хятад руу томилолтоор явахдаа Г.Байгальмааг хөтөч хийлгэн дагуулж явдаг байсан тухай манай баттай эх сурвалж хэлж байна. Харин Г.Сувд-Эрдэнэ нь улс төрд нөлөөлөл ихтэй бизнесмений дүү аж.

  Монголд сайдын суудлын төлөө улаан цайм тэмцэлдэж байдаг бол цаана нь Элчин сайдын яамдад олны нүднээс далдуур тохиролцооны томилгоо явагдсаар байна. Төрийн нууц задруулсан хэрэгт холбогдож байсан хүмүүс хэзээ хүртэл хятадуудтай ажилласаар байх вэ? Өмнө нь Улаан-Уулын заставт баахан цэрэг, ах­лагч нар нэгнээ хөнөөсний хэрэгт холбогдсон ХХЕГ-ын дарга асан Ц.Баатарцогт генералыг бас гадаадад дипломат албанд явуул­ж байсан нь олон хүний ой санамжаас арчигдаж эхэлжээ. Мартагдах ёстой дараагийн хүмүүс нь тэд бололтой. Элчин сайдын яам гэдэг төрийн хайрыг даагаагүй хүмүүсийг хайцаалдаг алба болсон хэрэг үү?