Найман зуу гаруй залуучууд оролцсон МоАХ-ны залуучуудын анхдугаар хурал өндөрлөлөө. Залуус янз бүрийн өнцгөөс өөрсдийн бас өрсөлдөгч намаа шүүмжилж байлаа. Энэ дунд оролцогчдын сонирхлыг хамгийн их татсан илтгэл нь МАН-ын дарга, ерөнхий сайд С.Батболдод хандсан илтгэл байв. Энэ илтгэлийн сонирхолтой хэсгээс хүргэе.

- Чи баяр болгоноор олны өмнө гарч “Монголчууд баян амьдарна” гэж мөн ч олон удаа хэлсэн. Энэ үгийг хүлээсэн олон хөгшчүүл тэр сайхан цагийг үзэж чадалгүй үхэцгээж байна.
- Чи шинээр нээгдсэн объект болгон дээр очиж тууз хайчилж, шав тавьж “Дэмжинэ ээ” гэдэг үгийг мөн ч олон удаа хэлсэн. Дэмжинэ гэдэг үгэнд хүмүүс мөн ч их татагдаж байна.
- Чи иргэдтэй уулзсан уулзалт бүхэнд нижгээд “Аз жаргал” гэсэн үг орох ёстой гэж чанга дуугаар хэлсэн. Аз жаргал гэсэн үгтэй уулзалтад хүмүүс жигтэйхэн их хууртаж байна.
- Чи инээж буй хүүхэд “Монголын ирээдүй” гэжээ. Уйлж буй хүүхэд тэгээд юу юм бэ?
- Чи “Байгалийн баялаг”-ийг монголчууд тэгшхэн хүртэх ёстой гэж чанга дуугаар хэлсэн. Тэгээд чи “Бороо Гоулд”-ыг авсан. Бид чамд өгсөн. "Бороо гоулд" гэдэг үг одоо Монголын ард түмэнд домог болон үлдсэн.
- Чи шилжилтийн үед “Зовох” ёстой гэж чанга дуугаар хэлсэн. Шилжилтийн үе нь юм байлгүй бид бүгд “Зовж” байна.
- Чи таван одтой зочид буудлаар Монголын нэрийг өндөрт өргөнө өө гэж чанга дуугаар хэлсэн. Тэгээд чи “Чингис” зочид буудлыг өөрийн болгосон. Бид чамд хааны нэртэй буудлаа өгсөн. Одоо “Чингис” зочид буудал жирийн ард түмэнд огт хүртээлгүй болсон.
- Чи дэвшүүлсэн мөрийн хөтөлбөр болгондоо “МАН найдвартай”  гэж хэлсэн. “МАН найдвартай” гэсэн үгэнд хүмүүс маш их хулхидуулж байна.
- Чи Монголын говийг Монголын ирээдүй гэж чанга дуугаар хэлээд Таван толгой, Ухаа худагт томоохон эзнээр суусан. Бид чамд Таван толгой, Ухаа худгаа өгсөн. Монголын говь чамайг хагартал баяжуулж олигархи болгосон байна.
- Чи телевизэд өгсөн ярилцлага бүхэндээ Монголын ирээдүйг би авч явна гэж чанга дуугаар хэлсэн. Ирээдүйгээ чамд даатгуулсан монголчууд чамд маш ихээр хууртагдаж байна. Чи дандаа ирээдүй цаг дээр ярьдаг. Бид итгэдэг.
- Чи ерөнхий сайд болоод хөгжүүлнэ ээ гэж инээмсэглэн хэлсэн. Ерөнхий сайд болсноос хойш ядуусын бүхэл бүтэн арми, гэмт хэрэг, авилгал, хээл хахууль, төрөөс төрсөн тэрбумтнууд тоогоо алдаж,  дэд сайдууд болж харин чи ганцаараа хагартлаа баяжсан.
- Чиний хүссэн бүхнийг чинь С.Батболд гуай, монголчууд бид чамд өгсөн. Одоо чамд хэлэх нэг зөвлөгөө байна. Чи битгий давар аа, хуц аа...