Монголын хошин урлагийн “акул”-уудын нэг “Х Түц” продакшны хатан хаан И.Одончимэг хамтлагийнхаа залуу ханхүү Т.Бархүүтэй ханилан сууж, Сүндари хэмээх бяцхан гүнж төрүүлсэн.

   Монголын хошин урлагийн “акул”-уудын нэг “Х Түц” продакшны хатан хаан И.Одончимэг хамтлагийнхаа залуу ханхүү Т.Бархүүтэй ханилан сууж, Сүндари хэмээх бяцхан гүнж төрүүлсэн. Тэгвэл саяхнаас хатан, ханхүү хоёр гүнжийнхээ зургийг арилжлаа хэмээн вант улсад бөөн шуугиан дэгдээсэн билээ.
   Хошин урлагийн ертөнцөд байр сууриа бататгасан цөөн хэдэн продакшнууд чамгүй мөнгө олдгийг нуух юун. Гэтэл гуравхан сартай бяцхан охиноо ашиглан мөнгө олох нь монгол хүнд баймааргүй заншил биш гэж үү. Удам залгах үрийнхээ нялх зургийг олон мянган хүмүүст дэлгэж, зүгээр ч биш гурван сая төгрөгөөр зарсан нь их л зоригтой ээж,   аавын хийх үйлдэл юм.
   Барууны алдартай хүмүүсийн нэгэн адил хүүхдийнхээ зургийг зарлаа гэж бахархалтайгаар ярих нь хэтэрхий туйлширсан хэрэг биш гэж үү, монгол хүнийхээ хувьд. Бараа, Одноо хоёрт шинэ байр авахад гурван сая төгрөг дутаагүй л байлтай.
   Удахгүй хуримаа хийнэ гэсэн хосууд маань хуримын урилгаа 30 мянга, хуримын зургаа 300 мянгаар зарж мэдэх л юм. Цаашлаад хүүхдийнхээ нэг насны төрсөн өдрийн зургийг хэдэн ч төгрөгөөр зарах юм билээ. Магадгүй өөрсдөө Монголдоо “од” болохоор удам залгах “од”-ыг багаас нь гялалзуулаад байгаа юм болов уу, бүү мэд.
   Яасан өхөөрдмөөр юм бэ гэхээсээ илүү, хүүхдийн буян заяанд сэв суулгах нь дээ гэсэн хүмүүс нь олон байх юм. Арга ч үгүй биз, хэзээ монгол хүн хүүхдийнхээ, тэр тусмаа гуравхан сартай бяцхан үрийнхээ нялзрай зургийг зарж, мөнгө олж байлаа. Ой тойнд нь буухгүй асуудал шүү дээ.
   Юутай ч гуравхан сартай бяцхан Сүндари их л багаасаа эцэг, эхээ тэжээж байгаа юм байна. Өөрийг нь гуравхан саяар үнэлснийг том болоод дуулвал их л гомдох байх даа. Тэнгэрээс заяат хөх толботой зурган дээр нь тодоос тод “чухал” гэсэн цагаан тамга даруулсан нь аав, ээжийнх нь зөв үү, буруу юу бас л бүү мэд.