Сүүлийн үед МАН-аас “Би бодохдоо...” хэмээх сурталчилгаа хийж эхэлсэн нь сайнаараа ч, муугаараа ч газар аваад байна. “I think...” хэмээх ийм сурталчилгаа анх АНУ-ын ерөнхийлөгч эцэг Буш (George Herbert Walker Bush) ерөнхийлөгчийн сонгуульд өрсөлдөхдөө хэрэглэж байсан юм. Тэрээр “Би бодохдоо улс орныхоо хөгжлийг, АНУ-ын ирээдүйг, залуучуудын болосвролыг, эмэгтэйчүүдийн эрхийг ингэж бодож байна” хэмээн хийх ажил, төсөөлөл, мөрийн хөтөлбөрөө телевизийн цуврал реклам болгон хийж байсан гэдэг. Энэ нь үр дүнгээ өгч тэрээр ерөнхийлөгч болсон юм. Харин энэхүү сурталчилгааг хожим БНСУ-ын Ханара (Ханарагийн Үнэдсний Их Нам) нам хуулбарлан хэрэглэж байсан удаатай. Тэгвэл “I Think...” хэмээх сурталчилгаа манайд нутагшиж орой болгон хэдэн залуус телевизээр гарч “Би бодохдоо...” хэмээн үзэл бодлоо гэхээсээ илүү өөрсдийгөө рекламдах болсон. Энэхүү реклам нь эерэг гэхээсээ илүү сөрөг талтайг өнгөрсөн хугацаанд явагдсан эсрэг ажиллагаа нь нотлоод байна. Faсebook, twitter гээд нийгмийн сүлжээ, сайтуудын сэтгэгдлээр “Би бодохдоо...” бие биеэ гутаан доромжлох нэг арга боллоо. “Би бодохдоо...” гэж эхлээд л МАН болон АН-ын лидерүүдийн бүхий л сөрөг талуудыг харуулах акц болж хувирав. Эцэстээ “Би бодохдоо...” хэмээх сурталчилгааг санаачилсан МАН-д биш мушгин гуйвуулсан АН-д ашигтай болж эхлэв.

   Тиймээс АН-ын “Нэг ардчилал” клубын хэсэг залуус “Би бодохдоо...”-гийн эсрэг “Бид бодохдоо...” хэмээх сурталчилгааг хийлгэхээр нэгэн рекламны студитэй гэрээ байгуулж байгаа аж. МАН-ын залуус “Би бодохдоо...” хэмээн үзэл бодлоо илэрхийлдэг бол АН-ын залуус “Бид бодохдоо...” хэмээн ирэх сонгуулийн мөрийн хөтөлбөрөө, одоогийн Засгийн газрыг шүүмжилсэн хувилбарыг хийхээр сценари гаргаж, пиарчдыг ажиллуулж байгаа сурагтай.

   Ингэснээр МАН-ынхан дандаа “би” гэж ярьдаг. Харин АН-ынхан “бид” хэмээн ард түмэнтэйгээ санал бодлоо хуваалцдаг хэмээн сурталчилгааныхаа ялгааг ч тайлбарлан таниулах группыг ажиллуулах аж. Ийнхүү Монголын хоёр том нам хийж бүтээх ажлаасаа гадна үзэл суртлаараа ч өрсөлдөж эхэллээ.
   Хамгийн гол нь ард түмэнд “Би бодохдоо...” таалагдах болов уу? “Бид бодохдоо...” илүү сонсогдох болов уу? Ажиглаж л байхаас ...