Хойд Солонгосоос дүрвэж ирсэн Ан гэдэг иргэнд Өмнөд Солонгосын шүүх дөрвөн жил хорих ял оноожээ. Учир нь хэрэгтэн Ан Хойд Солонгосын дэглэмийг эрс шүүмжилдэг өөр нэгэн цагаач иргэнийг хөнөөхөөр завдсан байна. Тэрбээр Хойд Солонгосын дэглэмийг эсэргүүцэж, хоёр улсын хил давуулан ухуулах хуудас бүхий бөмбөлөг хийсгэдэг идэвхитнүүдийн нэг Пак Сан Хакийг хортой зүүгээр алахыг завдсан нь нотлогдсон юм. Мөрдөн байцаагчид Хойд Солонгосын тагнуулын байгууллагын даалгавраар энэ үйлдлийг хийсэн гэж мэдэгдэж байгааг “BBC” уламжиллаа. Ан гэгчийг өнгөрсөн оны есдүгээр сард баривчилсан бөгөөд Сөүлийн тойргын шүүх “Улс орны аюулгүй байдалд ноцтой заналхийлсэн гэмт хэрэг” гэж  тодорхойлжээ.

   Ноцтой нь "BBC" агентлагийн сэтгүүлчийн дурдсанаар бол хэрэгтэн Ан 2010 онд Улаанбаатар хотод ажил хэргийн шугамаар ирээд байхдаа Хойд Солонгосын тагнуулын байгууллагуудын төлөөлөгчидтэй уулзжээ. Тэр уулзалтаар Пак Сан Хакыг хороох даалгавар болон төлбөрөө авсан байна. Ан Хойд Солонгосын төлөөлөгчдөөс нийт 10,399 доллар буюу 13,5 сая төгрөг авч явсан гэж хэвлэлүүдэд бичжээ.

  Ан гэгчийн бүтэн нэрийг ч одоогоор нууцалж байгаа бөгөөд 40 настай, 1990-ээд оны дундуур Өмнөд Солнгос руу дүрвэж ирсэн, Хойд Солонгост байхдаа тусгай хүчний албан хаагч байсан гэсэн мэдээлэл байгаа юм. Өмнөд Солонгосын “Рехап” мэдээллийн агентлаг түүнийг хамтран ажилладаг байсан Сөүлийн тусгай албаныхантайгаа таарамжгүй, тэдэнд сэтгэл дундуур байсан тул Хойд Солонгосын талд худалдагдсан гэж мэдээлжээ. Ан гэгчийн энэ үйлдэл хойд солонгосчууд Өмнөд Солонгосын иргэдийг хөнөөх гэсэн анхны оролдлого биш юм. Урьд нь Өмнөд Солонгост ирсэн хоёр цагаач иргэнийг мөн шийтгэж байжээ. Тэд Хойд Солонгосын тусгай албаны даалгавраар Сөүлд зугтаж ирсэн томоохон албан тушаал хашдаг Ван Жан Епийн амь насанд халдахаар зэхэж байгаад баригдсан аж.  Аллага үйлдэхээр ирсэн зорилгоо нууж, анх цагаачлан орж ирсэн гэж мэдүүлж байжээ. Харин Хойд Солонгосын тал тагнуулдаа ийм даалгавар өгч Өмнөд Солонгос руу илгээдэг гэдгийг хэзээд үгүйсгэж, эрс няцааж ирсэн юм.